Houthit arrijnë në Dhubab të Jemenit ndërsa qindra familje largohen nga shtëpitë e tyre -

Përshkallëzimi i luftimeve në Jemen ka detyruar qindra familje të largohen nga shtëpitë e tyre në jug dhe perëndim të vendit. Forcat Houthi, të mbështetura nga Irani, kanë intensifikuar sulmet javët e fundit, duke goditur me pesë raketa balistike zona në provincën Taiz.

Banorët raportojnë se situata është bërë e papërballueshme. Në rajonet al-Wazi’iyah dhe Mawza të Taizit, si dhe në Hays të provincës Hodeidah, janë dokumentuar abuzime të rebelëve me civilët. Kjo ka shkaktuar panik dhe ikje masive.

Sipas dëshmive të banorëve, fushatat e arrestimeve dhe bastisjet në shtëpi kanë detyruar më shumë se 150 familje të strehohen në zonën Bani Omar, të kontrolluar nga qeveria e njohur ndërkombëtarisht.

Në Hodeidah, situata është përkeqësuar. Forcat Houthi kanë bastisur zyra të organizatave humanitare, në një valë veprimesh që burimet lokale i cilësojnë të dëmshme për popullsinë civile dhe stafin e ndihmave.

Sulmet e reja pasuan rifillimin e luftimeve rreth qytetit bregdetar të Mokhas. Në përgjigje, forcat qeveritare kanë ripozicionuar dhe përforcuar praninë e tyre përgjatë bregdetit perëndimor. Të njëjtat trupa dërguan përforcime edhe drejt Dhubabit, në provincën Taiz.

Këshilli Kombëtar i Mbrojtjes së Jemenit u shpreh të enjten se çdo përparim “i përkohshëm” i rebelëve nuk u jep atyre të drejtën të imponojnë një realitet të ri me forcë. Ai theksoi se shteti dhe ushtria ishin të aftë të rimerrnin kontrollin dhe të vazhdonin operacionin parandalues në fronte të ndryshme.

Përplasjet e kësaj jave janë më të ashprat që nga arritja e armëpushimit në vitin 2022. Sipas agjencisë së lajmeve AFP, të paktën 500 persona, shumica luftëtarë, kanë humbur jetën në këto luftime. Dhuna ka shkaktuar edhe shpërnguljen e të paktën 20,000 njerëzve, sipas Kombeve të Bashkuara.

Mijëra civilë janë nisur nga Mokha dhe zonat përreth drejt Adenit, qytetit jugor ku ndodhet qeveria. /ABC24.AL/