Hita sqaron përdorimin e fishekëve të gomës dhe bën bilancin: Janë dëmtuar 132 punonjës policie, një efektiv me fraktura të rënda në nofull!

Bilanci i protestës, Hita jep shifrat: 167 të arrestuar dhe 7 policë të pezulluar

Kreu i Policisë së Shtetit, Skënder Hita, ka dhënë detaje mbi masat e marra pas protestës së fundit. Sipas tij, 167 persona janë arrestuar, ndërsa 388 të tjerë po procedohen penalisht.

Për veprimet gjatë tubimit janë pezulluar 7 efektivë. Ndaj tyre ka nisur procedimi disiplinor. Shkak është dyshimi për tejkalim të proporcionalitetit.

Hita u shpreh se asnjë punonjës nuk ka vepruar me urdhër jashtë kompetencave ligjore. Ai e theksoi këtë me forcë.

“167 persona janë arrestuar dhe 388 të tjerë janë proceduar penalisht. Janë pezulluar 7 punonjës policie, ndaj të cilëve ka nisur hetimi disiplinor për tejkalim të proporcionalitetit. Asnjë punonjës policie nuk ka marrë urdhër për të vepruar jashtë kompetencave të tij”, tha ai.

Numri i të lënduarve në radhët e uniformave blu është i lartë. Gjatë përplasjeve janë dëmtuar 132 punonjës policie. Disa prej tyre vijojnë ende nën kujdes mjekësor. Njëri prej efektivëve ka marrë plagë të rënda në gojë dhe nofull, me fraktura të shumta.

Drejtori i Policisë ngriti shqetësim për një tjetër fenomen. Në disa grupe në rrjetet sociale po qarkullojnë thirrje për dhunë ndaj Policisë së Shtetit.

“Janë dëmtuar 132 punonjës policie, disa prej të cilëve vijojnë të marrin ndihmë mjekësore. Në rrjetet sociale, në disa grupe po bëhen thirrje për dhunë kundër Policisë së Shtetit”, deklaroi Hita.

I pyetur për përdorimin e fishekëve të gomës në Tiranë, ai dha sqarime. Pajisjet e përdorura ishin të lejuara dhe të certifikuara. Ato u përdorën në mënyrë të kufizuar, sipas standardeve që zbatohen edhe në vendet e Bashkimit Evropian.

Protestuesit, sipas Policisë, kanë sulmuar me sende të forta. Vida dhe zara metalike, të hedhura me mjete të ndryshme, kanë plagosur shumë efektivë.

“Mjetet dhe pajisjet policore të lejuara, që janë përdorur, janë përdorur në mënyrë të kufizuar, pasi nga ana jonë përdoren mjete të përcaktuara, si në të gjitha vendet e BE-së. Policia përdor vetëm pajisje të certifikuara për këtë qëllim. Në këto protesta të dhunshme, nuk mund të mendojmë që një grup i vogël përfaqëson të gjithë protestuesit, si ata të qetë, ashtu edhe ata të dhunshëm. Vida dhe zara, që qëllohen me mjete të tjera, kanë dëmtuar shumë punonjës policie. Një prej punonjësve ka pësuar dëmtime të rënda në gojë dhe në nofull, pasi ka fraktura të shumta”, u shpreh Hita.