Hita në Maqedoninë e Veriut, apel për zgjerimin e Task-Forcës rajonale kundër emigracionit: Bashkëpunimi është çelësi kundër krimit

Bashkëpunimi rajonal është vendimtar për frenimin e emigracionit të parregullt dhe goditjen e krimit të organizuar.

Kështu u shpreh Drejtori i Përgjithshëm i Policisë së Shtetit, Skënder Hita, në tryezën për zgjerimin e Task Forcës së Përbashkët kundër Migracionit të Parregullt, e cila u mbajt në Maqedoninë e Veriut.

Gjatë diskutimeve, ai propozoi anëtarësimin e Greqisë dhe të Bosnjë-Hercegovinës me të drejta të plota në këtë strukturë. Sipas tij, ky zgjerim do të ishte një hap i rëndësishëm. Ai do të forconte më tej bashkërendimin mes vendeve të rajonit.

Hita theksoi se emigracioni i parregullt është i lidhur ngushtë me aktivitetin e rrjeteve kriminale. Ai përmendi trafikimin e qenieve njerëzore, falsifikimin e dokumenteve, pastrimin e parave dhe forma të tjera të krimit ndërkombëtar të organizuar.

“Task Forca është më shumë se një mekanizëm bashkëpunimi. Është një shembull konkret i asaj që mund të arrijmë kur informacioni, ekspertiza dhe veprimi operacional i vendeve tona bashkohen në kohë”, u shpreh Hita.

Ai vlerësoi rezultatet e arritura nga Task Forca Shqipëri-Mbretëri e Bashkuar. Kjo strukturë u krijua në vitin 2023. Më pas u zgjerua me Kosovën, Maqedoninë e Veriut dhe Malin e Zi. Sipas Hitës, operacionet e përbashkëta, shkëmbimi i informacionit dhe hetimet e koordinuara kanë rritur efektivitetin në goditjen e grupeve kriminale.