Himara përjeton natë apokaliptike, disa banesa të shkrumbuara dhe pemëtari të kthyera në hi! Shumë banorë u evakuuan, nis ndërhyrja nga ajri

Nata mes 4 dhe 5 shtatorit shënoi një përvojë të rëndë për qytetin bregdetar të Himarës. Flakët e një zjarri të madh përfshinë disa banesa dhe shkatërruan dhjetëra hektarë me pemëtari, duke shkaktuar panik të madh. Për fat të mirë, sipas informacioneve paraprake, nuk u regjistrua asnjë person i lënduar.

Gjithçka nisi mbrëmjen e premtes në lagjen nr. 1, pranë zonës së bypass-it. Një vatër e fuqishme shpërtheu aty dhe, për shkak të erës së fortë, flakët u përhapën me shpejtësi të jashtëzakonshme. Sipas Prefekturës dhe Mbrojtjes Civile, gjashtë ndërtesa u shkrumbuan plotësisht. Tre prej tyre ishin të banuara, ndërsa tre të tjera jo.

Situata u bë menjëherë dramatike. Banorët dhe turistët u detyruan të braktisin shtëpitë dhe bizneset, duke u zhvendosur në zona më të sigurta. Disa pronarë të bizneseve turistike shprehën se zjarri i kishte gjetur plotësisht të papërgatitur, teksa flakët udhëtonin me shpejtësi nga erërat e forta.

Gjatë gjithë natës, rreziku nuk u hoq. Në orët e para të mëngjesit të së shtunës, rreth orës 02:00, një tjetër banesë u përfshi nga flakët, shtuan panikun tek familjet e mbetura në zonë.

Për të përballuar situatën, u aktivizuan menjëherë forcat e shumta. Forcat e Armatosura dhe zjarrfikëse nga qytete të ndryshme të vendit mbërritën në terren. Misioni i tyre ishte izolimi dhe shuarja e vatrave aktive.

Mëngjesin e sotëm, ndërhyrja mori edhe përmasa ajrore. Helikopterët nisën hedhjen e ujit mbi flakët, në përpjekje për të ndaluar përhapjen e mëtejshme të zjarrit. Forcat në terren po punojnë pa ndalim për të mbrojtur banesat e mbetura dhe për të vënë nën kontroll situatën, ende të vështirë.