Himara në luftë me zjarret, prefektja Alushi dhe ministri Lamallari në terren: Janë djegur 6 banesa dhe pemëtari! Vlerësim dëmeve pas shuarjes së flakëve

Zjarri shpërtheu në lagjen 1 Maji të Himarës që prej mbrëmjes së djeshme, duke shkaktuar dëme të konsiderueshme. Flakët e furishme kanë shkrumbuar të paktën gjashtë banesa dhe një pemëtari.

Evis Alushi, prefektja e Qarkut Vlorë, konfirmoi shifrat e dëmeve të parë. Ajo theksoi se vlerësimi përfundimtar i situatës do të bëhet vetëm pasi flakët të jenë shuar plotësisht. "Nuk ka pasur bagëti të djegura," sqaroi ajo.

Operacioni i shpëtimit vijon me intensitet të lartë. Për herë të parë në orët e para të mëngjesit, në ndihmë erdhën edhe helikopterët. Ata po hedhin ujë nga ajri mbi vatrat kryesore për të dobësuar flakët.

Në terren janë angazhuar Forcat e Armatosura së bashku me grupe të shumta zjarrfikësish nga qytete të ndryshme të vendit. Përpjekja kryesore është izolimi i zonave aktive për të mbrojtur banesat e tjera.

Ministri i Brendshëm, Besfort Lamallari, mbërriti pak çaste më parë në Himarë për të monitoruar nga afër situatën.

Banorët përshkruajnë një natë të tmerrshme. Stuhia e erës përshpejtoi përhapjen e flakëve, duke detyruar shumë persona dhe turistë të braktisin shtëpitë dhe bizneset. Fatmirësisht, nga informacionet paraprake nuk ka të lënduar.

Situata vijon të jetë kritike. Rreth orës 02:00 të mëngjesit të sotëm, një tjetër ndërtesë u përfshi nga zjarri, çka shtoi panikun në zonë. Ekipet po punojnë pa ndërprerë për të vënë nën kontroll flakët që kërcënojnë zonat e banuara.