“Hetimet janë mbyllur prej një viti”- Plarent Ndreca: S’ka asnjë arsye që Veliaj të mbahet në paraburgim, gjykatat e tre shkallëve nuk treguan kujdesin e duhur

Plarent Ndreca deklaroi në studion e “Shqipëria Live” se nuk ka më arsye për mbajtjen nën masë të paraburgimit të kryetarit të Bashkisë së Tiranës, Erion Veliaj. Avokati theksoi se ndërhyrja e mundshme në prova nuk mund të supozohet. Ajo duhet të mbështetet në fakte konkrete.

Duke komentuar vendimin e Gjykatës Kushtetuese, Ndreca vuri në dukje një mungesë arsyetimi të masës së sigurisë. “Gjykata Kushtetuese ka konstatuar mungesën e një arsyetimi, që të treja shkallët e gjyqësorit nuk kanë vlerësuar elemente të tjera, siç është që z. Veliaj ka një mandat kushtetues në raport me ndërhyrjen potenciale të mundshme. Edhe rrethana e faktit që masa e sigurimit ka rënë si arsye”, tha ai.

Sipas tij, kohëzgjatja e një viti nga përfundimi i hetimeve është një argument tjetër. Kjo duhet të merret parasysh në vlerësimin e masës së sigurisë. “Edhe rrethana e faktit që masa e sigurimit ka rënë si arsye. Ka kaluar një vit që hetimi ka përfunduar. Nuk ka asnjë arsye që z. Veliaj të mbahet në masën ekstreme të sigurisë. Gjykata Kushtetuese me të drejtë vendosi si arsye shtesë që kemi të bëjmë me një të zgjedhur politik. Nuk ka asnjë mundësi të ketë cenim të provave. Prokuroria është e gatshme t’i drejtohet gjykatës. Prezumohet që prokuroria e ka përfunduar të gjithë procesin e saj. Ajo i ka të gjitha provat për të bindur gjykatën. Arsyeja që mbahet në paraburgim është ajo që thonë zotërinjtë e Gjykatës Kushtetuese. Ata thonë që gjykatat nuk kanë vlerësuar si duhet raportin e Veliajt”, tha avokati.

Me këtë, Ndreca nënvizoi se deklaratat e Gjykatës Kushtetuese tregojnë se drejtësia nuk ka aplikuar masën e paraburgimit në mënyrë të justifikuar. Ai shtoi se duhet marrë parasysh edhe mandatin kushtetues të Veliajt si të zgjedhur. Avokati kërkoi që prokuroria të vijë me një kërkesë të fortë drejt gjykatës. Ai mbështeti se provat nuk kanë qenë të cenueshme.