“Helsinki” letër Burgut 313: Jepini fund shkeljes së të drejtave të ish-presidentit Meta

Komiteti Shqiptar i Helsinkit i kërkon IEVP "Jordan Misja" në Tiranë të respektojë të drejtat e ish-presidentit Ilir Meta. Ai do që t'i sqarohen ankesat për ndalimin e takimeve me deputetë.

Në letrën e dërguar sot, më 10 shtator, organizata i drejtohet drejtuesit të burgut, z. Bozhaj. Shpreh shqetësimin për trajtimin e kufizuar të vizitave të Meta-s.

Kërkesa vjen pas ankesave të ngritura nga vetë Meta dhe deputeti Tedi Blushi. Pretendojnë se u është mohuar e drejta të takohen me deputetë të Kuvendit të Shqipërisë dhe të Parlamentit Evropian. Sipas tyre, nuk u është ofruar ndonjë vendim zyrtar apo bazë ligjore për këtë kufizim.

Komiteti thekson se një kufizim i tillë duhet të mbështetet në një argument të qartë dhe të ligjshëm.

Sipas gazetares së Klan News, Glidona Daci, kjo çështje u ngrit edhe më herët gjatë monitorimeve në atë IEVP. Pikërisht në prill të këtij viti, Komiteti i kishte dërguar burgut shkresën nr. 151 prot., datë 27.04.2026. Atëherë u rekomandua që të respektoheshin të drejtat e garantuara të paraburgosurve. U mbështet veçanërisht neni 51 i ligjit nr. 81/2020 "Për të drejtat dhe trajtimin e të dënuarve me burgim dhe të paraburgosurve".

Komiteti vlerëson se pas atij rekomandimi kishte pasur një impakt pozitiv në praktikën e institucionit. Prandaj, rikthimi i pretenduar i së njëjtës praktike ngre shqetësim.

Ekspertja ligjore e KShH, e deleguar nga drejtoresha ekzekutive Erida Skëndaj, kërkon informacion zyrtar. Do të dijë nëse kanë ndryshuar rrethanat faktike që do të justifikonin një qasje të re.

Sipas nenit 51 të ligjit, të paraburgosurve u garantohen të drejta të caktuara. Një prej tyre është e drejta për takime. Për këtë, Komiteti kërkon informacion sipas ligjit nr. 119/2014 "Për të drejtën e informimit".

letra e plotë:

I nderuar Z. Bozhaj,

IEVP Jordan Misja

Përcillen ankesat e Z. Tedi Blushi dhe Z. Ilir Meta dhe kërkohet informacion mbi trajtimin e tyre

Komiteti Shqiptar i Helsinkit (KShH) në përmbushje të misionit për mbrojtjen e të drejtave dhe lirive themelore të shtetasve, është vënë në dijeni të ankesave nga Z. Tedi Blushi, deputet i Kuvendit të Shqipërisë dhe Z. Ilir Meta, president i Partisë së Lirisë, nëpërmjet të cilave ngrihen shqetësime lidhur me moslejimin e zhvillimit të takimeve të këtij të fundit deputetë të Kuvendit të Shqipërisë dhe deputetë të Parlamentit Evropian, pa u bërë me dije një vendim i arsyetuar apo baza ligjore mbi të cilën është mbështetur ky kufizim.

KShH dëshiron të rikujtojë se kjo çështje është trajtuar edhe më herët në kuadër të monitorimit të kryer në IEVP "Jordan Misja". Janë adresuar edhe rekomandime institucionit tuaj nëpërmjet shkresës nr. 151 prot., datë 27.04.2026. Atëherë u vlerësua se kufizimi i takimeve të të paraburgosurve me deputetë ngre shqetësime serioze në raport me respektimin e të drejtave të garantuara nga ligji. U veçua neni 51 i ligjit nr. 81/2020 "Për të drejtat dhe trajtimin e të dënuarve me burgim dhe të paraburgosurve".

Në vijim të këtij procesi monitorimi dhe korrespondencës institucionale, KShH ka konstatuar se kishte një impakt pozitiv në praktikën e ndjekur nga institucioni. Pikërisht për këtë arsye, rikthimi i pretenduar i së njëjtës praktike ngre shqetësim dhe kërkon sqarim. Duhet sqaruar nëse kanë ndryshuar rrethanat faktike që do të justifikonin një qasje të ndryshme nga ajo e ndjekur pas rekomandimeve të mëparshme.

Sa më sipër, në respektim të ligjit nr. 119/2014 "Për të drejtën e informimit", KShH do të vlerësonte informimin nga ana juaj mbi pretendimet e Z. Ilir Meta dhe Z. Tedi Blushi. Lutemi të gjeni bashkëlidhur për dijeninë tuaj, letrat e cituara më sipër. Duke ju falenderuar për bashkëpunimin e deritanishëm, mbetemi në pritje të një përgjigjeje zyrtare nga ana juaj!

Me konsideratë,

eTAR Eksperte Ligjore

I HBA

Me porosi dhe me delegim nga

Erida Skëndaj

Drejtore Ekzekutive