“Harta jonë me 100 bashki i shërben qytetarit”- Konflikti për Territorialen, Bardhi akuza mazhorancës: Rama kërkon të shuajë edhe 15 bashki të tjera!

Kryetari i Grupit Parlamentar të Partisë Demokratike, Gazment Bardhi, ka shprehur qëndrimin e prerë të opozitës kundër propozimit të shumicës socialiste për Reformën e Re Territoriale.

Në një reagim të bërë publik në rrjetet sociale pas mbledhjes së grupit parlamentar, Bardhi nëvizoi se në seancën e ardhshme parlamentare do të përballen dy koncepte krejtësisht të ndryshme për qeverisjen vendore.

Përplasja e dy modeleve, 46 apo 100 bashki?

Sipas përfaqësuesit të opozitës, harta e propozuar nga Partia Socialiste, e cila parashikon tkurrjen e vendit në 46 bashki, udhëhiqet vetëm nga prapavija politike. Në të kundërt, opozita propozon një riorganizim me 100 njësi vendore.

“Nesër, përballë janë dy modele: harta me 46 bashki e PS-së i shërben interesit elektoral të Edi Ramës; harta me 100 bashki e PD-së vë në qendër interesin e qytetarëve,” deklaroi Bardhi.

Centralizimi i pushtetit dhe heqja e kompetencave

Kryetari i grupit të PD-së akuzoi kryeministrin se përmes kësaj reforme po formalizon një model të përqëndruar drejtimi, duke i zhveshur bashkitë nga funksionet e tyre bazë në favor të pushtetit qendror.

“Ai ua ka marrë ndërkohë bashkive kompetenca me ligje dhe vendime të qeverisë, nga furnizimi me ujë te menaxhimi i mbetjeve. Tani kërkon edhe bashki më të mëdha, pa u kthyer kompetencat dhe fondet që u duhen për t’u shërbyer njerëzve,” u shpreh ai.

Sipas tij, propozimi i opozitës synon decentralizimin e plotë, duke afruar shërbimet publike pranë komuniteteve dhe duke rritur buxhetet e investimeve në nivel lokal.

Bilanci i reformës së vitit 2014

Në mbyllje të deklaratës së tij, Bardhi u ndal edhe te pasojat e reformës administrative të realizuar një dekadë më parë, duke e cilësuar atë një dështim që po kërkohet të thellohet edhe më tej.

“Reforma e vitit 2014 la pas më pak investime në shumë zona, shkolla e qendra shëndetësore të mbyllura dhe shërbime më larg banorëve. PS kërkon ta thellojë këtë dështim duke shuar edhe 15 bashki, dhe t’ua nxijë jetën akoma më shumë njerëzve,” përfundoi reagimin e tij kryetari i grupit parlamentar të PD-së.