“Hap tjetër për memorandumin e MAXXI”- Blendi Gonxhja pret në takim ministrin e Kulturës së Italisë: Dy vendet tona i lidh miqësia e hershme!

Ministri i Turizmit, Kulturës dhe Sportit Blendi Gonxhja u takua me homologun italian të Kulturës Alessandro Giuli. Në fokus të bisedës ishte forcimi i bashkëpunimit kulturor mes dy vendeve. Palët ndalën edhe te projekti i hartuar nga Fondazione MAXXI për Galerinë Kombëtare të Arteve.

Lajmin e bëri të ditur vetë Gonxhja përmes një postimi në rrjetet sociale. Ai theksoi se takimi përbën një hap konkret drejt jetësimit të memorandumit të mirëkuptimit me MAXXI. Dokumenti u nënshkrua në Romë, në kuadër të takimit mes dy qeverive, asaj shqiptare dhe asaj italiane.

Gjatë diskutimeve u trajtuan disa drejtime bashkëpunimi. Në tryezë u sollën arkivat dhe procesi i digjitalizimit, organizimi i ekspozitave të përbashkëta dhe programet e shkëmbimit. Po ashtu u fol për bashkëprodhimet në fushën audiovizive dhe për zgjerimin e rrjeteve muzeore.

Sipas Gonxhes, objektivi mbetet krijimi i më shumë hapësirave për profesionistët e kulturës. Shkëmbimi i përvojave dhe rritja e aksesit të publikut në art dhe trashëgimi janë prioritet. Qëllimi është që publiku në të dy vendet të jetë më pranë krijimtarisë artistike.

"Shqipërinë dhe Italinë i lidh një miqësi e hershme, që pasurohet përmes njohjes së ndërsjellë dhe krijimtarisë", u shpreh Gonxhja. Ai nënvizoi nevojën për projekte konkrete dhe për lidhje më të ngushta mes njerëzve dhe institucioneve kulturore.

Bashkëpunimi me institucionet italiane pritet të nxisë shkëmbimin artistik. Ai synon gjithashtu të hapë mundësi të reja për zhvillimin e nismave të përbashkëta mes Shqipërisë dhe Italisë.