Guvernatori pa imunitet të ri, nisma e socialistëve lë jashtë mbrojtjen nga arrestimi të drejtuesve të Bankës! Diskutime te Ekonomia

Nisma e re e socialistëve heq mbrojtjen nga arrestimi për krerët e Bankës Qendrore

Propozimi për imunitet ndaj arrestimit dhe kontrolleve për Guvernatorin dhe Zëvendësguvernatorët e Bankës së Shqipërisë është lënë jashtë nismës më të re parlamentare. Bëhet fjalë për një ndryshim kursi, vetëm dy muaj pasi Ministria e Financave kishte hedhur për konsultim publik një projekt të ri që parashikonte pikërisht këtë garanci.

Nisma është paraqitur nga deputetë të Grupit Parlamentar të Partisë Socialiste. Ajo u depozitua në Kuvend më 25 shtator 2026. Firmëtare e dokumentit është Milva Ekonomi, deputete socialiste dhe kryetare e Komisionit për Ekonominë, Punësimin dhe Financat. Teksti përcakton rregullat se çfarë ndodh në rast të shkarkimit të Guvernatorit apo të zëvendësve të tij.

Megjithatë, mbrojtja e veçantë procedurale nuk është përfshirë. Kjo garanci ishte pjesë e draftit integral për Bankën Qendrore të propozuar vetëm pak muaj më parë.

Në projekt përcaktohet qartë rruga e ankimit. “Guvernatori i shkarkuar nga detyra ka të drejtë ta ankimojë vendimin për shkarkim në Gjykatën e Drejtësisë të Bashkimit Evropian, ndërsa anëtarët e tjerë të Këshillit mund të ankimojnë vendimin për shkarkim në përputhje me legjislacionin për gjykatat administrative.”

Më 15 korrik 2026 Ministria e Financave publikoi për konsultim draftin e ri integral “Për Bankën e Shqipërisë”. Konsultimi mbeti i hapur deri më 12 gusht. Atje, neni 72 me titull “Dispozita të veçanta për administratorët” parashikonte një regjim të posaçëm. Sipas tij, drejtuesit më të lartë të Bankës nuk mund të arrestoheshin, të privoheshin nga liria apo të kontrolloheshin personalisht dhe në banesë pa miratim paraprak nga Gjykata Kushtetuese.

Dy muaj më vonë qasja ka ndryshuar. Në vend të një ligji krejtësisht të ri, projektligji i 25 shtatorit parashikon ndërhyrje vetëm në disa nene të ligjit aktual nr. 8269/1997.

Paketa e re ka 7 nene në total. Ajo trajton financimin monetar, huadhënien për sektorin publik, titujt e borxhit të qeverisë, rezervën e detyrueshme dhe pozicionin e drejtuesve të Bankës. Mbrojtja nga arrestimi e parashikuar në korrik mungon.

Kjo do të thotë se miratimi i paketës së shtatorit nuk do t'u japë Guvernatorit dhe Zëvendësguvernatorëve imunitetin që parashikonte drafti i verës. /Top Channel/