Gogu pas vendimit të Hagës: “Lufta e UÇK-së ishte luftë e drejtë, asnjë vendim gjykate nuk e ndryshon këtë”

Pas aktgjykimit të Dhomave të Specializuara të Kosovës për krerët e UÇK-së, ministri i Drejtësisë, Toni Gogu, e ka vlerësuar atë si një çast të rëndë për popullin kosovar dhe mbarë kombin shqiptar.

Gogu tha se mendimet e tij janë sot drejt të gjithë atyre që luftuan për liri, si dhe familjeve të dëshmorëve që paguan çmimin më të lartë. "Lufta e UÇK-së ishte luftë e drejtë. Asnjë vendim gjykate nuk e ndryshon këtë të vërtetë historike," theksoi ai në reagimin e tij.

Ministri vuri në dukje se ky vendim nuk e vë në diskutim natyrën e drejtë të luftës së UÇK-së. "Në këtë ditë të vështirë, mendimet e mia janë me qytetarët e Kosovës," përfundoi deklaratën e tij Gogu.

Vendimi i Gjykatës së Hagës u dëgjua për rastet e ish-presidentit Hashim Thaçi, ish-kryetarit të Kuvendit Jakup Krasniqi, si dhe ish-krerëve ushtarakë Kadri Veseli e Rexhep Selimi.