“Gjyq i stisur!”- Ilir Meta gjatë seancës së shtyrë: S’e kuptoj konfliktin me avokatët, kam kërkuar ndërhyrjen e Kuvendit! Kundërshtoj Prokurorinë për afatet

Seanca e së enjtes në Gjykatën e Posaçme për ish-presidentin Ilir Meta u shty. Shkak u bë bojkoti i avokatëve. Njëkohësisht u pezulluan afatet e paraburgimit.

Meta u shfaq i shqetësuar për këtë vendim. Ai reagoi ashpër gjatë seancës. Sipas tij, shtyrja dëmton procesin dhe llogaritjen e ditëve të qëndrimit në paraburgim.

“Sikurse e dini nga përvoja në këtë çështje, ashtu sikurse edhe prokurorët e dinë, unë kam qenë i pranishëm që prej ditës së parë. Në mënyrë abuzive përdoret mungesa e avokatëve për pezullimin e afateve të paraburgimit, në mënyrë që të mos më njihet asnjë ditë burg. Nuk e kuptoj konfliktin mes avokatëve dhe Gjykatës. Unë nuk mund t’i kërkoj avokatit tim të humbasë licencën”, mësohet të ketë deklaruar Meta, sipas raportimit të “A2 CNN”.

Ish-kreu i shtetit kundërshtoi kërkesën e prokurorisë për pezullimin e afateve. Ai tha se është i gatshëm që gjykimi të vazhdojë normalisht.

“E kundërshtoj kërkesën e prokurorisë që të pezullohet ecja e afateve të paraburgimit. Unë jam këtu dhe jam që të vijojë gjykimi, ose ndryshe ky konflikt është i stisur. Unë kam kërkuar ndërhyrjen e Kuvendit, unë nuk jam shkak i këtij konflikti”, u shpreh ai.

Në pamundësi për të vijuar gjykimin, Gjykata e Posaçme vendosi shtyrjen. Trupi gjykues gjobiti avokatët. Po ashtu pezulloi afatet e masës së sigurisë për Metën.

Pasi trupa u largua nga salla, Meta komentoi sërish situatën. Ai e cilësoi konfliktin si të stisur. Sipas tij, pas tij qëndrojnë shokët e Ergys Agasit.