GJKKO vendos që gjyqi ndaj Metës dhe Kryemadhit të vijojë pa avokatë, gjoba për katër mbrojtësit

Gjykata e Posaçme ka vendosur që procesi gjyqësor ndaj Ilir Metës dhe Monika Kryemadhit të vijojë edhe pa praninë e avokatëve mbrojtës. Gazetarja Flutura Tota bën me dije se vendimi u mor pasi avokatët e zgjedhur nga të pandehurit nuk u paraqitën në seancë në kuadër të bojkotit, ndërsa edhe dy avokatet e caktuara përmes ndihmës juridike falas refuzuan të merrnin përsipër mbrojtjen. Njëra prej avokateve të ndihmës juridike falas argumentoi se nuk do të merrte pjesë për shkak të bojkotit, ndërsa tjetra pretendoi se çështja nuk përmbushte kushtet për ofrimin e ndihmës juridike falas.

GJKKO i vlerësoi të pabazuara kërkesat e të katër avokatëve për të mos përfaqësuar Metën dhe Kryemadhin. Për avokatët e zgjedhur nga të pandehurit, gjykata caktoi gjobë prej 20 mijë lekësh për secilin, ndërsa për dy avokatet e ndihmës juridike falas gjoba u caktua në masën 5 mijë lekë për secilën.

Seanca e radhës u caktua më 29 tetor, në orën 11:00. Ndërkohë, për Ilir Metën u vendos pezullimi i afateve të paraburgimit.

Në një deklaratë të shkurtër pas seancës, Ilir Meta u shpreh se është i gatshëm të mbrohet edhe vetë, duke e cilësuar situatën si një lojë për zvarritjen e procesit gjyqësor.

Meta deklaroi gjithashtu se kishte takuar në ambientet e gjykatës kryetarin e Dhomës së Avokatisë, të cilit i kishte kërkuar një zgjidhje për situatën. Sipas tij, ky i fundit i kishte thënë se gjatë ditës do të zhvillonte një takim lidhur me këtë çështje në Këshillin e Lartë Gjyqësor (KLGJ).