GJKKO nën akuzë për censurë ndaj medias, Kikia: Rregullorja e re cenon lirinë e medias dhe të drejtën e mbrojtjes

Emisioni 'Repolitix' në Report Tv hapi sot sezonin e ri, ku ndër çështjet e diskutuara ishte edhe rregullorja e re e Gjykatës së Posaçme Kundër Krimit të Organizuar dhe Korrupsionit (GJKKO). E pranishme në studio ishte edhe kritika se akti i ri kufizon lirinë e medias gjatë seancave gjyqësore.

Gazetari Mentor Kikia, i ftuar në program, e cilësoi absurd debatin nëse mediat duhet të ndjekin apo jo gjykimet në këtë gjykatë. Sipas tij, çështjet e trajtuara aty kanë interes publik të lartë, pasi të akuzuarit janë funksionarë të lartë shtetërorë të lidhur me fondet e shtetit. "Është e domosdoshme që media të jetë prezente, që qytetarët të informohen mbi ngjarjet brenda sallës," u shpreh ai. Kikia kujtoi se edhe në kohën e regjimit komunist, mediat i ndiqnin normalisht gjyqet ndaj ish-udhëheqësve si Ramiz Alia apo Hekuran Isai. "Të diskutosh në 2026-ën nëse duhet ndjekur mediatikisht, më duket absurditet," shtoi gazetari.

Kikia theksoi se ndonëse gjyqtari mund të kufizojë praninë e medias në çështje të veçanta, kjo nuk duhet të cënojë të drejtën themelore të informimit. Qytetarët janë të interesuar të dëgjojnë se çfarë ndodh në gjyqet e rëndësishme, sipas tij.

Nga ana tjetër, ish-prokurori Ervin Karanxha vërejti se rregullorja e re prek edhe të drejtën e avokatëve. Ai u ndal në ndalimin e mbajtjes së telefonit nga avokati gjatë seancës, duke e konsideruar këtë një goditje ndaj së drejtës së mbrojtjes. Karanxha tha me ironi se "avokati nuk do ta përdorë telefonin për të goditur të pandehurin". Sipas tij, telefoni është një mjet komunikimi dhe pune në funksion të avokatisë, veçanërisht kur shumica e çështjeve në atë gjykatë kanë të bëjnë me shpërdorim detyre. Dhoma Kombëtare e Avokatëve ka shprehur edhe më parë pretendime të sakta lidhur me këtë cështje, përfundoi Karanxha.