GJKKO i pezulloi dënimin, ja momenti i lirimit të Greta Gjocit nga Burgu i Pojskës! Në krahë mban foshnjën e saj, familjarët falënderojnë…

Greta Gjoci ka lënë qelinë këtë të enjte. Lirimi i saj nga IEVP Pojskë erdhi pas vendimit të Gjykatës së Posaçme për shtyrjen e ekzekutimit të dënimit.

Rreth orës 16:30, familjarët mbërritën pranë burgut për ta marrë. Më parë 33-vjeçarja kishte përmbyllur procedurat e nevojshme që kërkon dalja nga institucioni.

Ajo u largua me foshnjën në krahë. Për mediat nuk dha asnjë deklaratë. Ndërkohë familjarët e saj, larg kamerave, shprehën falënderime për gjykatën dhe për median për mënyrën se si u trajtua rasti.

Gjoci bën pjesë në grupin e gjashtë grave të shpallura fajtore së bashku me Bruno Çobon. Bëhet fjalë për dosjen e mashtrimit përmes skemës së njohur si “Call Center”.

Nga dënimi i caktuar në shkallë të parë, asaj i kanë mbetur edhe mbi 3 vite e 5 muaj për të vuajtur. Legjislacioni parashikon që, kur një e dënuar ka fëmijë nën një vjeç, ekzekutimi i vendimit mund të shtyhet nga gjykata deri sa foshnja ta mbushë këtë moshë.