Gjetja dhe hetimi i 2800 tonë mbetjeve të rrezikshme, Ministria e Mjedisit i heq lejen mjedisore kompanisë “Kurum”!

Ministria e Mjedisit ka hequr zyrtarisht lejen mjedisore për kompaninë turke “Kurum International”, me vendimin e miratuar nga ministri Sofjan Jaupaj më 3 nëntor të vitit 2026, me firmën e urdhrit nr. 540.

Leja e hequr është ajo e tipit A, e lëshuar për aktivitetet e kompanisë në shtator të vitit 2016, në zonën e ish kombinatit Metalurgjik në Elbasan. Vendimi prek të gjitha aktivitetet industriale që kryen Kurum në këtë vendndodhje: prodhimin e çelikut, shkrirjen e metaleve, fonderinë, përpunimin dhe saldimin e metaleve, si dhe prodhimin e gëlqeres.

Propozimi për pezullimin e lejes kishte ardhur nga Agjencia Kombëtare për Mjedisin (AKM) dhe u miratua zyrtarisht nga Ministria e Mjedisit.

Ky vendim vjen pas një periudhe prej dy vitesh që kompania është nën hetim nga Prokuroria e Durrësit. Hetimi është lidhur me ngarkesën e rrezikshme prej 2800 tonë mbetjeve, të cilat ishin nisur nga porti i Durrësit drejt Tajlandës, por u kthyen në Shqipëri për shkak të rrezikshmërisë që paraqisnin për mjedisin dhe shëndetin publik.

Në shkurt të vitit 2026, prokuroria e Durrësit lëshoi gjithsej 33 urdhërarreste lidhur me këtë ngarkesë të rrezikshme. Në listën e akuzuarve përfshijnë edhe disa funksionarë shtetërorë, të cilët mbajnë detyra në institucione publike.