Gjermania i bën presion BE-së për Ballkanin: Nuk e kemi përmbushur atë që premtuam

Gjermania i kërkon BE-së të mbajë premtimin për Ballkanin Perëndimor

Ministri i Jashtëm gjerman Johann Wadephul u ka bërë thirrje shteteve anëtare të Bashkimit Evropian të respektojnë angazhimet për zgjerimin në Ballkanin Perëndimor. Ai paralajmëroi se Brukseli rrezikon kredibilitetin dhe peshën në rajon nëse nuk e shpejton procesin.

Deklarata u bë pas takimit të Procesit të Berlinit. Aty vendet e BE-së dhe ato të Ballkanit Perëndimor diskutuan integrimin ekonomik, infrastrukturën dhe pajtimin rajonal. “Procesi i zgjerimit të BE-së është në një pikë kthese”, tha Wadephul për gazetarët, sipas Politico.

Shefi i diplomacisë gjermane kujtoi Samitin e Selanikut të vitit 2003. Atëherë BE-ja u premtoi vendeve të Ballkanit Perëndimor anëtarësimin në union. Ai foli edhe për rolin e Berlinit. Ish-kancelarja Angela Merkel e nisi Procesin e Berlinit në vitin 2014 për të përshpejtuar afrimin me BE-në. Por edhe 12 vite më vonë, sipas tij, nuk ka përparim konkret.

“Nuk e kemi përmbushur atë që premtuam”, deklaroi Wadephul. Ai shtoi: “Do t’u bëja thirrje të gjithëve t’u tregojnë atyre se premtimi i Selanikut ishte i vërtetë, se jemi të besueshëm dhe se Evropa mund të jetë një partner tek i cili mund të mbështetesh”.

Në fjalën e tij ministri përmendi edhe konkurrencën gjeopolitike. BE-ja përballet me rivalë si Rusia dhe Kina për ndikim në Ballkan.

Aktualisht Mali i Zi prin në rrugën e zgjerimit. Podgorica synon të bëhet anëtari i 28-të i BE-së në vitin 2028.