Gjendet e djegur makina e dytë e përdorur nga bashkëpunëtorët e Gentian Çipit pas arratisjes në Greqi, zbulohet pista e re

Në mëngjesin e së shtunës, në zonën e Volvës, rreth 60 kilometra nga Serresi në Greqi, është gjetur një automjet i djegur plotësisht. Ky mjet dyshohet se ishte përdorur nga personat që ndihmuan arratisjen e të dënuarit shqiptar, Gentian Cipi, nga spitali i Serresit mbrëmjen e kaluar.

Një kalimtar e vuri re flakën dhe njoftoi menjëherë zjarrfikësit, të cilët arritën ta shuanin zjarrin. Sipas burimeve hetimore, lokacioni ku u gjet makina është tejet i rëndësishëm. Ai mund të zbulojë rrugën e arratisjes së autorëve pas sulmit në spital.

Kjo është makina e dytë e lidhur me ngjarjen. Më herët, pranë hyrjes së spitalit ishte braktisur një "Nissan Navara". Brenda saj, policia gjeti një armë automatike kallashnikov, një bidon me benzinë dhe targa.

**Detajet e arratisjes**

Gjithçka ndodhi shpejt të premten në mbrëmje. Një grup i armatosur, i maskuar dhe i veshur si efektivë policie, sulmoi eskortën e burgut në oborrin e spitalit. Me kërcënime dhe armë, ata e çarmatosën rojën e jashtme dhe rrëmbyen Gentian Cipin, duke u larguar me automjetin e tyre.

Gentian Cipi ka një historik të pasur krimesh në të dy vendet fqinje. Në Shqipëri, ai u dënua në korrik të vitit 2024 me dy vjet burg për "shkatërrim të pronës me zjarr në bashkëpunim". Akti për të cilin u dënua kishte ndodhur më 24 prill 2023, kur u djeg një mjet në Korçë, në lagjen 13, rruga "Loni Grazhdani".

Për të njëjtin incident, në fillim të 2023-it, ishte proceduar edhe në kuadër të operacionit "Fijet", pasi iu gjetën kamera të instaluara ilegalisht pranë banesës.

Përtej kufirit shqiptar, Cipi kishte arritur të arratisej edhe më parë. Më 3 shtator 2024, ai qëlloi me armë në Pylaia të Selanikut, duke tentuar të vrasë një 25-vjeçar grek. Viktima u qëllua me tri plumba, por mbijetoi, ndërsa Cipi u largua nga vendi i ngjarjes.