Franca në gadishmëri dhe gjendje të jashtëzakonshme, 70 mijë policë, forca speciale dhe xhandarë në terren për protestën e dhunshme!

Franca po përgatitet për një ditë tjetër me tensione të larta protestash, të parashikuar për më 24 tetor. Për të shmangur përsëritjen e dhunës së javës që lamë pas, qeveria ka vendosur në gatishmëri rreth 70 mijë policë e xhandarë në të gjithë territorin e vendit.

Ministri i Brendshëm Laurent Nuñez ka bërë të qartë se shteti nuk do të bëjë asnjë lëshim ndaj vandalëve dhe plaçkitësve. “Do të jemi të pakompromis”, ka paralajmëruar ai.

Në terren do të hidhen edhe njësi elitare si RAID, GIGN dhe BRI. Helikopterë dhe dronë do të mbikëqyrin lëvizjet nga ajri.

Sipas autoriteteve, vëmendje e veçantë po i kushtohet thirrjeve në rrjetet sociale që vijnë nga ekstremi i majtë për sulme ndaj ndërtesave publike. Njësitë elitare pritet të përdoren kryesisht për të mbrojtur objektet strategjike.

Në disa qytete, mes tyre Lioni, protestat janë ndaluar në zona të caktuara. Prefektët, nga ana e tyre, po vlerësojnë rast pas rasti rrezikun e trazirave të reja.

Presidenti Emmanuel Macron ka thirrur Këshillin e Mbrojtjes. Ai pritet të takohet me organizatat studentore për të dëgjuar kërkesat e tyre, ndërsa më pas do të vizitojë forcat e rendit.

Paralelisht, kryeministri Sébastien Lecornu u ka kërkuar prefektëve të shqyrtojnë mundësinë e vendosjes së orëve policore të pjesshme e lokale në zonat më të rrezikuara.

Ish-kryeministri Gabriel Attal ka hedhur një paralajmërim më të ashpër. Nëse situata nuk qetësohet pas protestave të së shtunës, sipas tij mund të bëhet e nevojshme shpallja e gjendjes së jashtëzakonshme.

Ndërkohë, përplasja politike është thelluar më tej. Kritikët e qeverisë e akuzojnë Macronin se ka humbur kontrollin mbi situatën, ndërsa autoritetet përpiqen të shmangin një valë të re dhune e vandalizmi.