“Forcim i partneritetit strategjik me SHBA”- Ambasadori i ri amerikan i dorëzoi Letrat Kredenciale, Begaj pas takimit kokë më kokë me Wendt: Thellim i marrëdhënieve!

Ambasadori i ri i Shteteve të Bashkuara në Tiranë, Eric Wendt, ka paraqitur sot Letrat Kredenciale te Presidenti Bajram Begaj. Pritja u zhvillua në kuadër të ceremonisë zyrtare për akreditimin e diplomatit amerikan.

Kreu i shtetit i pranoi letrat dhe i uroi përfaqësuesit të Uashingtonit punë të mbarë gjatë mandatit në Shqipëri. Ai e vlerësoi momentin si konfirmim të lidhjeve të ngushta mes dy vendeve.

Gjatë bisedës, Begaj rikonfirmoi vullnetin e palëkundur të Tiranës për ta forcuar më tej aleancën strategjike me Uashingtonin. Sipas tij, ky bashkëpunim mbetet shtyllë qendrore e politikës së jashtme shqiptare.

Presidenti deklaroi: “Shqipëria do të vijojë të angazhohet plotësisht në thellimin e marrëdhënieve, duke u mbështetur në përparësitë e politikës së saj të jashtme dhe në përgjegjësitë që burojnë nga marrëdhënia e ngushtë”. Ai shtoi më tej se “Shtetet e Bashkuara janë një partner i pazëvendësueshëm për avancimin e interesave kombëtare”.

Menjëherë pas përfundimit të ceremonisë formale, Begaj dhe ambasadori Wendt zhvilluan një bisedë kokë më kokë. Takimi u mbajt me dyer të mbyllura.