Falsifikimi dhe tjetërsimi i pronave, Prokuroria e Fierit sekuestron 2.6 mln euro cash dhe një makinë luksoze “Bentley” (DETAJET)

Prokuroria pranë Gjykatës së Shkallës së Parë të Juridiksionit të Përgjithshëm Fier ka vendosur sekuestro mbi 2.6 milionë euro, të cilat ndodheshin në llogari bankare. Bashkë me shumën u bllokua edhe një automjet luksoz i markës “Bentley”.

Masa u mor në kuadër të një procedimi për dokumente të falsifikuara dhe pastrim parash.

Asetet rezultojnë në emër të shtetasit Kastriot Hasko. Ai qëndron aktualisht nën masën “Arrest në shtëpi”. Sipas akuzës, i dyshuari ka shfrytëzuar vendime të falsifikuara për të regjistruar sipërfaqe të mëdha toke.

Po ashtu u sekuestrua një “Bentley Flying Spur” i prodhimit 2024. Vlera e deklaruar e blerjes kap shifrën e 250 mijë eurove.

Organi i akuzës i cilëson këto pasuri si produkt të mundshëm të veprave penale nën hetim. Hasko hetohet për “Falsifikimi i dokumenteve” dhe “Pastrimi i produkteve të veprës penale ose i veprimtarisë kriminale”. Këto parashikohen përkatësisht nga nenet 186/2 dhe 287 të Kodit Penal.

Prokuroria e Fierit thekson se verifikimet do të vijojnë. Qëllimi mbetet zbulimi, bllokimi dhe më pas konfiskimi i çdo pasurie me origjinë të dyshuar kriminale.