Evropa ka nevojë për Turqinë në “arkitekturën e saj të sigurisë”, thotë Erdogan

Presidenti i Turqisë, Recep Tayyip Erdogan, deklaroi se "nuk është e mundur që Evropa të jetë më e fortë apo më e sigurt nëse Turqia përjashtohet nga arkitektura e saj e sigurisë".

Deklarata u bë në Nju Jork, në foltoren e Asamblesë së Përgjithshme të OKB-së. Sipas tij, Turqia, si pjesë e pandashme e kontinentit, mban një peshë të madhe për mirëqenien dhe sigurinë e Evropës. Ai e cilësoi samitin e NATO-s të mbajtur në Ankara gjatë korrikut, të organizuar me sukses, si provë konkrete të përkushtimit ndaj mbrojtjes së përbashkët.

Mediat e huaja, të cituara nga ABC24.AL, e shohin këtë qëndrim në vazhdën e deklaratave të një viti më parë. Atëherë kreu i shtetit turk u përpoq ta paraqiste vendin si pol stabiliteti në një botë gjithnjë e më të trazuar, duke nënvizuar rolin jetik të Ankarasë për sigurinë evropiane. "Është bërë e qartë edhe një herë se siguria evropiane është e paimagjinueshme pa Turqinë. Turqia është e gatshme të marrë përgjegjësi për sigurinë evropiane edhe në të ardhmen", theksoi ai në Forumin vjetor të Diplomacisë në Antalia.

Në periudhën kur marrëdhëniet transatlantike u ftohën gjatë administratës Trump, Ankaraja kërkon të zgjerojë ndikimin. Turqia është anëtare e NATO-s, disponon forcat e armatosura të dyta më të mëdha brenda Aleancës dhe ka një industri mbrojtjeje të avancuar.

Shtëpia e Bardhë ka bërë të ditur se kontinenti duhet të kujdeset vetë për mbrojtjen e tij, duke përfshirë edhe çështjen e Ukrainës. Deri më tani Uashingtoni nuk ka shfaqur gatishmëri për të mbështetur një forcë me përbërje kryesisht evropiane në Ukrainë përballë agresionit rus.

Ndërkohë Ankaraja është pozicionuar si ndërmjetëse kryesore në pellgun e Detit të Zi. Pavarësisht luftës, ajo ka ruajtur kanale komunikimi si me Kievin, ashtu edhe me Moskën.

Si Erdogani, ashtu edhe Trumpi kanë folur publikisht për raportin e ngushtë personal mes tyre. "Besoj se marrëdhëniet tona me Shtetet e Bashkuara do të lulëzojnë në çdo fushë gjatë mandatit të dytë të presidentit Trump, edhe falë kontributit të miqësisë sonë të ngushtë me të", u shpreh presidenti turk përpara një audience me liderë botërorë dhe diplomatë.

Turqia e ka dorëzuar aplikimin për anëtarësim në Bashkimin Evropian që në vitin 1987. Megjithatë ecuria e tij ka mbetur e ngrirë që prej vitit 2018.

Një raport i Parlamentit Evropian i publikuar vitin e kaluar vlerësonte se, pavarësisht peshës gjeopolitike dhe strategjike të Ankarasë, rinisja e negociatave nuk është e mundur në rrethanat aktuale. Arrestimi i kryetarit të Bashkisë së Stambollit, Ekrem İmamoglu, ndërhyrja ndaj protestave antiqeveritare dhe shkeljet e të drejtave të njeriut u renditën si shenja të regresit demokratik. /ABC24.AL/