Etna shpërthen sërish – kaos në aeroportin e Katanias, raportime për ‘fluturim’ të çmimit të biletave të aeroplanëve

Erupsioni i Etnës bllokon sërish Katanian, dyshime për rritje abuzive të biletave të avionëve

Erupsioni i ri i Etnës ka paralizuar sërish aeroportin Catania-Fontanarossa. Autoritetet u detyruan të ndalin çdo operim ajror.

Sipas mediave ndërkombëtare, të cituara nga ABC24.AL, vendimin e mori SAC, operatori që administron këtë aeroport. Qielli mbi zonë u mbyll pas shtimit të madh të hirit vullkanik dhe erës së pafavorshme.

Të gjitha uljet dhe nisjet mbeten të pezulluara deri në orën 23:59 të së dielës, më 27 shtator. Kufizimi ishte vendosur fillimisht deri në orën 12:00. Më vonë u shty.

Për të shmangur kaosin, kompania u kërkoi udhëtarëve të kontrollojnë statusin e fluturimit te linja e tyre ajrore. Askush nuk duhet të shkojë në terminal pa këtë verifikim paraprak.

Gjatë së shtunës, bllokimi rëndoi gjithë qarkullimin në rajon, raportojnë mediat. Ndërprerja shkaktoi efekt zinxhir në Comiso, Palermo dhe Trapani. Këto aeroporte u mbingarkuan menjëherë nga avionët e devijuar për shkak të emergjencës.

Mijëra pasagjerë mbetën të bllokuar, në kërkim të alternativave. Nuk ishte më vetëm çështje logjistike.

Ngërçi solli reagime të forta nga shoqatat. Ato denoncojnë rrezikun e spekulimit me tarifat në një moment shumë delikat për qytetarët.

“Acli Terra” sinjalizoi rritje jonormale dhe kosto tepër të larta për fluturimet drejt ishullit dhe anasjelltas. Si rast ekstrem përmendi linjën Verona-Palermo, ku bileta shkoi rreth 1.180 euro.

Shoqata thekson se emergjenca natyrore nuk guxon të kthehet në dëm ekonomik për familjet. Ajo u kërkoi institucioneve të monitorojnë shtrenjtimin e çmimeve. Sipas saj, menaxhimi i episodeve të përsëritura prek drejtpërdrejt besueshmërinë dhe reputacionin e mbarë sistemit sicilian. /ABC24.AL/