EMRI/ Atentati në Athinë ku mbeti e plagosur edhe 10-vjeçarja shqiptare, urdhri dyshohet se u dha “Klodi”, bosi i ‘Mafies së burgjeve’! Babai i vajzës, pronar i…

Media greke kanë publikuar detaje të reja për atentatin e rëndë që tronditi Athinën mesnatën e fundit.

Nga të shtënat me armë në lagjen Agios Panteleimonas mbeti e plagosur një vajzë 10-vjeçare me origjinë shqiptare. E mitura ndodhej brenda një kafeneje kur persona të armatosur hapën zjarr drejt fasadës së lokalit.

Vajza është e bija e pronarit të kafenesë, Denis Luli, 30 vjeç. Në momentin e sulmit ajo ishte brenda me të atin.

Sipas raportimeve paraprake të mediave greke, autorët ishin katër persona në një automjet. Ata qëlluan pa dalë nga makina dhe u larguan me shpejtësi. Brenda lokalit ndodheshin rreth dhjetë klientë në atë moment.

Hetimet e para ngrenë dyshime se urdhri për sulmin është dhënë nga burgu. Bëhet fjalë për Klodian Lekocajn, një emër shumë i njohur për policinë greke. Lajmin e përcjell TCH.

Shënjestra e atentatit mbetet e paqartë. Po ashtu nuk dihen ende motivet e konfliktit.

Kush është Klodian Lekocaj?

I njohur edhe si Klod Cara, 49 vjeç, ai konsiderohet personazh kontrovers. Vitet e fundit është rikthyer në qendër të vëmendjes. Mediat greke e etiketojnë si kreun e të ashtuquajturës "Mafia e Burgjeve".

Nuk dihet sa i vërtetë është ky etiketim. Vetë Lekocaj, në daljet publike, e përshkruan veten si të varfër, të pafajshëm dhe të përdorur. Nga ana tjetër, sipas raportimeve, faktet, dëshmitë dhe përgjimet në duart e policisë greke ngrenë dyshime të forta. Ato e lidhin atë me një rol të rëndësishëm në botën e nëndheshme të grupeve kriminale shqiptare dhe greke.

Në përgjime dhe dëshmi të ndryshme, emri i tij përmendet për lidhje me banda kriminale. Dyshohet se u ka vënë në dispozicion, për vete apo për të tjerë, persona të konsideruar si vrasës me pagesë.

Një rast i tillë lidhet me 14 shtatorin e vitit 2022. Atë ditë policia greke arrestoi rastësisht dy shqiptarë në Athinë. Bëhet fjalë për Viktor Çalën, 39 vjeç, dhe Andi Beqirin, 23 vjeç. Në makinën e tyre u gjetën të fshehura dy kallashnikovë dhe një thikë. Në banesë iu gjet edhe një pistoletë.

Hetimi zbuloi se Çala ishte autor i vrasjes së një shtetasi grek. Ai dyshohet edhe për tentativën e vrasjes së një shqiptari. Të dyja ngjarjet kishin ndodhur në korrik 2022.

Për vrasjen e grekut, Çala deklaroi se kishte marrë urdhër nga Klodian Lekocaj. Motivi, sipas tij, ishte prishja e pazareve të drogës. Lekocaj, i njohur në kartelat greke edhe si "Luli" apo "Ilia", u përball kështu me një akuzë të re.

Më parë ai ishte akuzuar për porositjen e vrasjeve të avokatit grek Mixalis Zafiropoulos, të të burgosurit Arbër Bako dhe të të burgosurit Bardhyl Tusha. Në listën e akuzave renditen edhe përfshirja në tentativën për vrasjen e një pakistanezi, gjobëvënia ndaj ish-ministrit grek Dimitri Tsovola dhe ndihma për arratisjen e të burgosurve Leonard dhe Elvis Pepa.

Përveç urdhrave të dyshuar, Lekocaj ka edhe precedentë si autor i drejtpërdrejtë. Ai u arrestua për herë të parë në vitin 1997 për vjedhje. Në vitin 2003 u arratis nga burgu i Volosit.

Në vitin 2005, sërish në Agios Panteleimonas, plagosi me armë zjarri në bark një shqiptar. Një vit më vonë, në të njëjtën zonë, së bashku me dy shqiptarë të tjerë, plagosi me thikë një bashkëkombës.

Në vitin 2013 u arrestua për trafik droge dhe vjedhje. U dërgua në burgun e Korfuzit. Një vit më vonë, pasi mori leje, u arratis në vitin 2014.

Pak ditë pas arratisjes, së bashku me Arbër Bakon, mori pjesë në një tentativë grabitjeje. Si pasojë mbeti i plagosur një shtetas egjiptian. Më 31 tetor 2014, po me Arbër Bakon, Olti Dulçen dhe një shtetas polak, dyshohet se kreu një vrasje në zonën e Metaksurgios.

Arrestimi përfundimtar ndodhi në nëntor 2014 në Sepolia. Ai u kap së bashku me Dhimo Mecin, një gjirokastrit të përfshirë në disa vrasje me pagesë në Greqi. Meci ishte në kërkim në momentin e ndalimit. Arrestimi erdhi pas ngjarjes së Mikrolimanos. Aty Arbër Bako, me kallashnikov, kishte plagosur disa klientë të një lokali.

Emri i Klodian Lekocajt është përmendur edhe në lidhje me shqiptarët Elvis Bogdani dhe Ari Papa. Të dy u ekzekutuan më herët në Greqi.

Në vitin 2019 ai u akuzua se rekrutoi nga Shqipëria një vrasës me pagesë për të ekzekutuar një pakistanez. Në mars të vitit 2023 ndaj tij u ngrit një akuzë tjetër. Bëhej fjalë për gjobëvënie prej 100 mijë eurosh ndaj një biznesmeni grek.

Në prill 2025, Lekocaj u akuzua sërish. Këtë herë për porositjen e atentatit ndaj shqiptarëve Kristjanis Stefa dhe Florian Bajraktari. Ngjarja kishte ndodhur më 23 shtator 2024.

Në maj 2025 ai mori peng dy gardianë të burgut të Korydhalosit. I kërcënoi me thikë dhe u mori çelësat, radiot dhe telefonat. Më pas u nis drejt një sektori tjetër të burgut, së bashku me shtatë egjiptianë. Qëllimi dyshohet se ishte futja në Repartin 3 për të vrarë një shqiptar. Ndërhyrja e forcave të tjera bëri të mundur neutralizimin e tyre.

Disa ditë më vonë policia kontrolloi qelinë e Lekocajt dhe të disa të dënuarve të tjerë. Aty u gjetën sende të ndaluara. Mes tyre kishte celularë, thika dhe kokainë.