EMRAT/ Nga Pisa në SHBA, arrestohen 2 të shumëkërkuar nga drejtësia shqiptare, akuzohen për vrasje dhe grup kriminal! Pritet dhe ekstradimi

Dy persona të shpallur në kërkim nga drejtësia shqiptare janë vënë në pranga jashtë vendit.

Njëri prej tyre është 37-vjeçari Aleksandër Baho, i njohur edhe si Aldo, i kapur në Pisa të Italisë. I dyti është Valentin Ftoni, i ndaluar në Shtetet e Bashkuara të Amerikës.

Ftoni i ishte shmangur për kohë të gjatë drejtësisë duke përdorur identitete të ndryshme. Në Shqipëri ai rezulton i dënuar me 25 vite burg për vrasje. Së bashku me kunatin e tij Paulin Kola, akuzohet se në vitin 2001 vrau për hasmëri shtetasin Behar Becaj.

Ndërkohë Aleksandër Baho, i njohur me nofkën “Sakati”, përshkruhet si krahu i djathtë i Endrit Alibej. Ky i fundit u ekzekutua më 29 dhjetor 2018. Ndaj Bahos, Gjykata e Posaçme kundër Korrupsionit dhe Krimit të Organizuar (GJKKO) ka caktuar masën e sigurisë “arrest me burg”. Akuza ndaj tij është për vrasje të mbetur në tentativë, e kryer në kuadër të grupit të strukturuar kriminal.

Sipas policisë, 37-vjeçari dyshohet se në vitin 2022 ka ndërmjetësuar për vrasjen e Lulzim Mashës në Tiranë. Ngjarja, e planifikuar brenda grupit kriminal ku bënte pjesë, nuk u realizua. Dëshmitë e të penduarve të drejtësisë Nuredin Dumani dhe Henrik Hoxhaj kanë zbuluar një detaj kyç. Sipas tyre, armët që do të përdoreshin për atentatin ishin marrë nga Aldo Baho në Elbasan.