Elbasani voton pro bashkimit me Cërrikun e Belshin, tensione dhe përplasje në Këshillin Bashkiak

Këshilli Bashkiak i Elbasanit ka dhënë miratimin për projektin e riorganizimit territorial në nivel qarku. Propozimi parashikon shkrirjen në një njësi të vetme të bashkive Elbasan, Cërrik dhe Belsh. Vendimi u mor me shumicë votash nga anëtarët e këshillit.

Miratim u bë me 26 vota pro dhe 2 kundër. Votimi u zhvillua pas një cikli dëgjesash me publikun. Në to morën pjesë 589 qytetarë, ndërsa 516 prej tyre mbështetën këtë variant bashkimi.

Gjatë mbledhjes nuk munguan debatet. Grupi opozitar shprehu rezerva të forta ndaj projektit. Ai kërkoi mbajtjen e tre bashkive aktuale. Në vend të shkrirjes, opozita sugjeroi krijimin e dy njësive të reja, Bradashesh dhe Shpat. Sipas saj, ky model do të ruante decentralizimin dhe do t'i mbante shërbimet më pranë qytetarëve.

Momenti që tërhoqi më shumë vëmendje ishte ndërhyrja e këshilltarit të PSD-së, Erion Murataj. Ai mbajti një qëndrim të prerë kundër reformës së propozuar.

"Pasi zhbëtë identitetin krahinor, sot PD dhe PS prodhuan shpopullim, varfëri, mjerim. Po i jepni kazmën e fundit me pseudoreformën të ardhmes së Shqipërisë dhe të ardhmes së shqiptarëve. Do ju dalë përpara një Avni Rustemi. Jam kategorikisht kundër kësaj reforme", deklaroi ai.

Reagimi i tij u shoqërua me tension në sallë. Pak para nisjes së votimit, Murataj ndërhyri te pajisjet elektronike dhe fiku disa prej tyre. Situata u tensionua edhe më shumë. Tetë këshilltarë të Partisë Demokratike dhe një këshilltare e Partisë së Lirisë u larguan nga mbledhja. Megjithatë, procesi vazhdoi dhe propozimi për riorganizimin e rajonit mori dritën jeshile.