“Ekzekutivi dhe legjislativ janë bërë një”- Ish-prokurori Beci: Relativizim i frikshëm i institucioneve, reforma duhet bërë nga e para

**Ekzekutivi dhe legjislativi janë bërë një - Ish-prokurori Beci: Relativizim i frikshëm i institucioneve, reforma duhet bërë nga e para**

Ekzekutivi dhe legjislativi në Shqipëri, sipas ish-prokurorit Eugen Beci, nuk funksionojnë më si pushtete të ndara. Ai ka denoncuar një “relativizim të frikshëm” të institucioneve, sipas të cilit qëllimi është ngritja e kultit të pushtetit ekzekutiv.

Avokati e ish-magjistrati nënvizoi se vendi nuk ka “tre këmbë”, por vetëm dy, pasi njëri pushtet ia ka futur të tjerëve “këmbët në një këpucë”. Ai kujtoi se para vitit 2014, degët e shtetit kishin më shumë dinjitet. “Në këto vite ka ndodhur relativizim i frikshëm. Është relativizuar parlamenti, presidenti, ministri e çdo institucion i pavarur që të ngrihet kulti i pushtetit ekzekutiv”, tha Beci në një intervistë për televizionin “A2CNN”.

Sipas tij, cilësia e ligjeve ka rënë ndjeshëm. “Ka patur projekt ligje më cilësore në parlamentet e mëparshme. Është bërë relativizim i frikshëm i çdo institucioni”, përfundoi ai.

Beci shprehu bindjen se reforma në drejtësi duhet nisur nga fillimi, pasi mundësitë për përmirësim janë të kufizuara. “Nuk mund të arnohet më, por ajo duhet bërë nga e para”, tha ai.

Mangësi sipas tij ka edhe në Kushtetutë. “Kemi një mungesë vullneti, apo papërgjegjshmëri siç është rasti i moszbarkimit të vendimeve të GJK. Sot kushtetuta duket si bordero se sa do e kenë rrogën që janë institucionet të shkrira”, u shpreh ai.

Ish-magjistrati theksoi se nga pikëpamja kushtetuese, Shqipëria ka një charter të mangët me elementë që duhen ndryshuar. Ai shprehu habinë që nuk ka patur iniciativa për të rregulluar dispozitat e përkohshme. “Nuk është marrë njeri me asgjë, janë marrë me reformën në drejtësi që tregoi se nuk është bërë mirë”, vlerësoi Beci.

Detyrim tjetër i pazbatuar, sipas tij, është edhe hartimi i hartës gjyqësore. “Magjistratët duhet të ishin mbledhur më herët sa i përket hartës gjyqësore”, përfundoi intervistën ish-prokurori.