E rëndë në Greqi/ Shpërthen rafineria e naftës, humb jetën një shqiptar, një tjetër në gjendje të rëndë!

Një shpërthim i fortë ka goditur sot paradite rafinerinë e kompanisë "Motor Oil" në Agioi Theodoroi të Greqisë. Incidenti u regjistrua rreth orës 11:00. Nga ngjarja mbeti një person i vdekur dhe një tjetër i plagosur rëndë. Disa punonjës të tjerë pësuan lëndime më të lehta.

Në një reagim zyrtar, "Motor Oil" njoftoi se ngjarja ndodhi gjatë punimeve të mirëmbajtjes parandaluese me shtrirje të gjerë. Sipas kompanisë, dy punëtorë u lënduan rëndë. Atyre iu dha menjëherë ndihma e parë. Më pas u transportuan me urgjencë drejt spitalit. Gjendja e tyre u cilësua e rëndë, ndërsa po marrin trajtimin e nevojshëm mjekësor. Kompania shtoi se protokollet e sigurisë dhe ato të ndërhyrjes në raste emergjence u aktivizuan pa vonesë.

Orë më vonë u konfirmua edhe identiteti i viktimës. Bëhet fjalë për 43-vjeçarin Robert Cakaj, i cili ndërroi jetë. Në gjendje të rëndë vijon të jetë 50-vjeçari Dorian Hysa. Ai mbahet i intubuar dhe nën kujdes intensiv.

Fillimisht të dy punëtorët me plagë të rënda u dërguan në Spitalin e Korinthit. Aty u paraqit edhe një i lënduar i tretë, me shqetësime shumë të lehta në frymëmarrje. Për shkak të gjendjes kritike, dy rastet më të rënda u transferuan më pas në spitalin Thriasio. Njëri prej tyre nuk mundi të mbijetojë. Tjetri mbetet në gjendje kritike, pasi ka pësuar dëmtime të rënda në kokë.

Sipas informacioneve paraprake, prokuroria ka kërkuar arrestimin e kontraktorit përgjegjës për punimet. Hetimet për zbardhjen e rrethanave të shpërthimit vijojnë.