E papritur/ Arbër Hoxha largohet nga Kroacia, vazhdon karrierën në… Azi

Merkatoja e verës nuk ka thënë ende fjalën e fundit për futbollistët shqiptarë, dhe një nga lëvizjet më të diskutuara të ditëve të fundit ka në qendër Arbër Hoxhën. Gjatë këtyre orëve, media kroate “Sportske Novosti” ka bërë të ditur se anësori 27-vjeçar pritet të vazhdojë karrierën në klubin e Al Vahda-s. Transferimi, sipas të njëjtit burim, pritet të finalizohet shumë shpejt.

Dinamo e Zagrebit do të përfitojë financiarisht nga kjo marrëveshje. Nga shitja e kartonit të lojtarit, klubi kroat do të arkëtojë plot 2.5 milionë euro. Por kujdes, jo gjithçka përfundon këtu, pasi Dinamo do të mbajë në pronësi edhe 10% të të drejtave të lojtarit për një shitje të ardhshme.

Ky zhvillim vjen si një surprizë e vërtetë për Hoxhën. Duke pasur parasysh se po zhvillon një sezon mjaft të mirë, shumë prisnin që ylli i Kombëtares kuqezi të bënte një hap përpara drejt një kampionati më cilësor. Megjithatë, me shumë mundësi, e ardhmja e tij do të jetë në Emiratet e Bashkuara Arabe, larg fushave evropiane.