“E paprecedentë”- Rrëzimi i kërkesës së PD për mocion me debat për SHISH, Bardhi akuzon: Kuvendi po shmang përgjegjësinë!

Konferenca e Kryetarëve rrëzoi kërkesën e opozitës për zhvillimin e një mocioni me debat lidhur me çështjen e SHISH-it. Reagimi i parë erdhi nga kreu i grupit parlamentar të Partisë Demokratike, Gazment Bardhi.

Sipas tij, Kuvendi po i shmanget përgjegjësisë që ka për sigurinë e Republikës së Shqipërisë. Ai e konsideroi këtë qëndrim të paprecedentë për një shtet demokratik.

Bardhi dënoi vendimin e mazhorancës për të bllokuar diskutimin. E cilësoi të paimagjinueshme që legjislativi të tërhiqet nga një detyrë thelbësore.

Sipas Bardhit, dënimi penal i autorëve u takon organeve të drejtësisë, ndërsa Kuvendi ka rol kontrolli mbi pushtetin ekzekutiv. Ky kontroll përfshin edhe SHISH-in dhe kërkon debat për akte që ai i sheh si të paprecedenta në një vend demokratik.

Ai theksoi se hetimi i SPAK nuk duhet penguar, por duhet mbështetur deri në zbardhjen e plotë. Përgjegjësia kryesore, sipas tij, nuk bie mbi Vlora Hysenin.

“Dënoj bllokimin që mazhoranca i bëri kërkesës për debat. Është e paimagjinueshme që Kuvendi t’i shmanget përgjegjësisë në raport me sigurinë e Republikës së Shqipërisë. Kjo nuk është çështje e drejtësisë. Çështje e drejtësisë është të çojë pas hekurave dhe para përgjegjësisë ligjore cilindo që ka kryer këtë vepër penale. Kuvendi nuk e ka këtë kompetencë, por ka kompetencën e kontrollit mbi pushtetin ekzekutiv dhe institucionet, përfshirë edhe SHISH-in. Në kuadër të këtij funksioni, ka përgjegjësinë të diskutojë për një nga aktet më të paprecedenta në një vend demokratik. S’kemi punë me hetimin e SPAK, veçse t’i lëmë të bëjnë punën e tyre, t’i nxisim ta çojnë punën deri në fund dhe t’i shkojnë këtij problemi në kokë. Koka nuk është Vlora Hyseni. Koka e kësaj afere, e kriminalizimit të institucioneve shtetërore dhe e përdorimit të institucioneve shtetërore si mekanizëm mbrojtës ndaj krimit të organizuar është padyshim Rama”, tha Bardhi.