E paprecedentë/ Protesta ka edhe “manual” nga Serbia? Studenti e pranon publikisht: Jemi në kontakt të vazhdueshëm me ta

Një student i angazhuar në protestat e Tiranës ka pranuar se mban lidhje të rregullta me studentë serbë. Sipas tij, me ta shkëmbehen ide mbi mënyrat e organizimit dhe format e veprimit të përdorura atje.

Deklarata u dha në emisionin "Breaking" në Euronews. Aty ai u pyet pikërisht për modelin e protestave në Serbi dhe për "Listën e Studentëve". Kjo e fundit, pas muajsh demonstratash, i ka kaluar tashmë kufijtë e sheshit dhe është shtrirë në planin elektoral.

I pyetur për këtë përvojë, studenti u përgjigj hapur. "Kam ndjekur dhe kam miq të mirë studentë në Serbi, me të cilët padyshim ngelemi në një kontakt të vazhdueshëm lidhur me organizimin e protestave dhe format që patjetër edhe ata kanë aplikuar", tha ai.

Edhe pse tubimi në kryeqytet prezantohet si nismë e të rinjve shqiptarë, pohimi tregon diçka tjetër. Të paktën një prej protestuesve konfirmon se ekziston një komunikim i pandërprerë me lëvizjen studentore serbe dhe shkëmbim mbi praktikat organizative.

Në të njëjtën intervistë ai foli edhe për të ardhmen politike. "Me thënë të drejtën, në Shqipëri nuk është menduar konkretisht krijimi i një alternative nga sheshi në këto momente. Bëhet fjalë për një alternativë, e cila do të vijë padyshim pas dorëheqjes së kryeministrit Edi Rama", u shpreh studenti.

Sipas tij, kërkesa e menjëhershme nuk lidhet me zgjedhjet. Objektivi kryesor mbetet largimi i shefit të qeverisë.

"Fokusi kryesor në protestat e të rinjve dhe të rejave në Tiranë është dorëheqja e Edi Ramës. Ata nuk duan t'i japin më kohë Edi Ramës deri të vijnë votimet. Ata kërkojnë padyshim dorëheqje", tha ai.

Pohimi për lidhjet me studentët në Serbi i shton një dimension të ri diskutimit publik. Në qendër tani është jo vetëm ecuria e protestës në Tiranë, por edhe modelet ku po kërkohet frymëzim për organizimin e saj.