“E kam nusen e vëllait”- Dhoma e Avokatisë ‘fal’ juristin që theu bojkotin për të mbrojtur nënën me fëmijën 4 muajshe!

Komiteti Disiplinor pranë Dhomës së Avokatisë ka shqyrtuar rastin e avokatit Mirgen Gjoci. Ai u paraqit për të mbrojtur Gerta Gjocin në seancën ku caktohej masa e sigurisë, ndonëse Dhoma kishte shpallur bojkot për të gjithë anëtarët e saj.

Për këtë shkelje trupa disiplinore nuk e ndëshkoi ashpër. Ndaj tij u dha vetëm një vërejtje, e shoqëruar me këshillim.

Në vendimmarrje u vlerësuan si rrethanë lehtësuese motivet humanitare. Gerta Gjoci është nënë e një foshnjeje vetëm katër muajshe, fakt që u mor parasysh nga Komiteti.

Ndikoi edhe lidhja e ngushtë familjare mes mbrojtësit dhe klientes. Vetë juristi ka bërë të ditur se e pandehura është nusja e vëllait të tij.

Trajtim krejt tjetër pati avokati Lefter Xhengo. Ai, i cili mbron Leli Kajën, u paraqit po ashtu në seancë gjyqësore gjatë periudhës së bojkotit. Për këtë arsye licenca e tij u pezullua për dy vjet.

Bojkoti i avokatëve u shpall si akt proteste kundër rregullores së re të GJKKO-së. Dhoma e Avokatisë e kundërshton këtë akt. Sipas saj, rregullorja cenon ushtrimin e profesionit dhe garancitë për një mbrojtje efektive.