Dyshohet se ‘gjobiste’ punonjëset, arrestohet bashkëshorti i ish-drejtoreshës së akuzuar të Postës Durrës! U kërkonte çdo muaj…

Në Durrës është ndaluar Feta Mataj, bashkëshorti i ish-drejtoreshës së filialit të Postës Shqiptare në qytet. Operacioni u krye sot.

Efektivët vendas e prangosën atë pas hetimeve të fundit. Prej pak kohësh, ai mbante detyrën e nëndrejtorit te ndërmarrja e pastrim-gjelbërimit në bashki.

Aksioni u finalizua nga Seksioni i Krimit Ekonomik. Lajmi u bë i ditur nga Top Channel.

Shkak për prangosjen u bë dëshmia e një punonjëseje të postës. Para hetuesve, ajo ka pohuar se burri i drejtoreshës u merrte çdo muaj nga 25 mijë lekë punonjëseve.

Ndërkohë, bashkëshortja e tij, Elisabeta Mataj, akuzohet për përvetësimin e mijëra eurove nga filiali i Durrësit. Ajo u mbajt në paraburgim që prej 18 korrikut.

Hetimi ndaj saj lidhet me vjedhjen në bashkëpunim përmes shpërdorimit të detyrës. Bëhet fjalë për 69 milionë lekë, para të destinuara për qytetarët në degët e Postës në Shijak dhe Krujë. Aktualisht ajo ndodhet në arrest shtëpie.