Dy persona dhunojnë drejtorin e Ujësjellësit të Elbasanit, Luan Tabaku u godit me sende të forta! Kush janë autorët dhe shkaqet e sulmit

Luan Tabaku, drejtori i Ujësjellësit të Elbasanit, u sulmua fizikisht gjatë ditës së dielë. Incidenti ndodhi rreth orës 10:45 në datën 6 shtator, në zemër të qytetit.

Sipas hetimeve të deritanishme, sulmin dyshohet ta kenë kryer dy persona: Endri Çopja dhe Horgito Peqini. Gjatë konfrontimit, viktimës iu shkaktuan lëndime të rënda. Kartela mjekësore konfirmoi se Tabaku pësoi dy fraktura në kokë, çka sugjeron se u përdorën edhe sende të forta.

Drejtori i Ujësjellësit zgjodhi të mos depozitonte një kallëzim zyrtar në Polici. Megjithatë, uniformat blu nisën hetimet me iniciativën e tyre, pasi shumë dëshmitarë okularë ishin të pranishëm në vendin e ngjarjes. Hetuesit po sqarojnë rrethanat e plota të këtij sulmi. Një nga pistat kryesore që po shqyrtohet lidhet me një konflikt të mundshëm për çështje punësimi.

Burimet hetimore bëjnë me dije se Tabaku mund të kishte larguar nga puna bashkëshorten e autorit të dyshuar, Endri Çopja. Ky vendim, sipas të njëjtave burime, shihet si një motiv i mundshëm për përplasjen fizike.

Më rëndësinë e ngjarjes e shton profili penal i të dyshuarve. Të dy personat e implikuar kanë precedentë të mëparshëm dhe ishin liruar së fundmi nga burgu për akuza të rënda.

Endri Çopja ishte arrestuar më herët si i dyshuar për përfshirje në atentatin me eksploziv ndaj Lulzim Kullës në Shkodër, më 13 janar 2018. Megjithatë, ai u la i liruar për mungesë provash.

I dyshuari tjetër, Horgito Peqini, është nipi i Eduart Peqinit, i njohur si "Mandela i Elbasanit". Horgito Peqini ishte liruar nga burgu pak kohë më parë. Ai kishte vuajtur dënimin për një vrasje të ndodhur në vitin 2022.

Vetë Luan Tabaku është një figurë e njohur dhe e përfolur në Elbasan. Prej vitesh qarkullon emri i tij si një ndër persona të afërt me Suel Çelën.

Në prill të vitit 2025, Tabaku u bë objekt i kontrolleve nga ana e agjentëve të Byrosë Kombëtare të Hetimit dhe e Policisë së Shtetit. Në muajt në vijim, ai u paraqit në Prokurorinë e Posaçme. Dyshimet ndaj tij lidhjen me favorizimin e Suel Çelës në tendera publikë. Deri më tani, lidhur me sulmin e fundit, ende nuk ka asnjë person të ndaluar.