Dubai, streha e të kërkuarve për trafik kokaine! Nga “Napoleoni” te bosët e klaneve shqiptare

Dubai, strehë për të kërkuar nga trafiku i kokainës! Nga “Napoleoni” tek klanet shqiptarë

Një organizatë kriminale ndërkombëtare që trafikon kokainë, me lidhje në Evropë dhe kontakte të drejtpërdrejta me kartelat kolumbiane, është objekt i hetimeve të autoriteteve italiane. Në krye të kësaj rrjeti shqiptar Eneo Carka, i njohur edhe si “Napoleoni”, i cili kërkohet nga disa shtete dhe dyshohet se ka organizuar transportimin e sasive të mëdha të drogës në disa vende.

Sipas raportit të gazetës italiane Corriere della Sera, Carka, 44 vjeç, ka krijuar një rrjet kontaktesh në Belgjikë, Britaninë e Madhe dhe Itali. Emri i tij është lidhur me dërgesa të mëdha kokaine në këto vende. Për komunikim me bashkëpunëtorët përdor pajisje dhe sisteme të sofistikuara, të cilat e bëjnë më të vështirë përgjimin e bisedave.

Në Milano, sipas hetimeve të Drejtorisë së Antimafias, Carka përdorte një bashkëkombës 46-vjeçar që banonte në Gallaratese. Ky person dyshohet se ka pasur rol në organizimin e mbërritjes së ngarkesave të kokainës, si dhe në kryerjen e pagesave për drogën.

Artikulli thekson se Carka ka krijuar lidhje edhe me drejtues të rëndësishëm të kartelave kolumbiane, mes tyre Otoniel, ish-kreu i Kartelit të Gjirit. Këto kontakte e kanë bërë atë një figurë të kërkuar në botën e krimit dhe një person me ndikim në rrjetet e trafikut të drogës në Evropë.

Ndërkohë, një tjetër emër i rëndësishëm në rajon është Sheval Muaremi, 49 vjeç, i konsideruar drejtuesi kryesor i klanit të Sarajit, zonë pranë Shkupit në Maqedoninë e Veriut. Ai është shpallur në kërkim për akuza që lidhen me vrasje, organizatë kriminale dhe trafikim të sasive të mëdha të kokainës. Prej dy vitesh jeton në Dubai, nga ku shfaqet edhe në rrjetet sociale, ndërsa dyshohet se vazhdon të drejtojë aktivitetet kriminale nga distanca.

Sipas artikullit, mungesa e marrëveshjeve dypalëshe mes Emirateve të Bashkuara Arabe dhe disa shteteve evropiane për ekstradim e ka lejuar këta persona të qëndrojnë në Dubai, pavarësisht urdhërarrestesh kundër tyre.

Në këtë qytet kishte jetuar për një kohë të gjatë edhe Denis Matoshi, një tjetër shtetas shqiptar i akuzuar për trafik droge dhe pastrim parash. Rreth një muaj më parë, ai iu dorëzua autoriteteve belge pas kërkesës së këtij shteti për ekstradimin e tij.

Ish-bashkëshortja e Matoshit, Suada, e cila vite më parë është shpallur “Miss Shqipëria” dhe ka punuar në spektakël, ka mbetur në Dubai pas ndarjes së çiftit. Sipas autoriteteve belge, ajo zotëron pasuri të paluajtshme në Emirate me vlerë rreth 17 milionë euro. Mediat raportojnë se ajo zhvillon një jetë luksoze dhe organizon festa të shtrenjta në shoqërinë e partnerit të saj të ri.

Xhelal Neziri, drejtues i Institutit Ballkanik për Media dhe Demokraci në Tetovë, vëren se në disa raste krijon përshtypjen se grupet kriminale kanë ndikim të madh, duke vështirësuar kontrollin nga institucionet shtetërore.

Sipas analizës së Corriere della Sera, këto organizata kanë treguar aftësi për t’u riorganizuar dhe për të vijuar aktivitetin edhe pas arrestimeve dhe hetimeve, duke zgjeruar lidhjet përtej kufijve kombëtarë. Ndërsa Dubai përmendet si një prej destinacioneve ku disa prej personave të kërkuar kanë gjetur strehim dhe vijojnë të menaxhojnë pasuritë apo aktivitetet e tyre nga distanca.