“Dua drejtësi për djalin tim”- Nëna nga Fieri pretendon për dhunë në kopsht: Dyshoj se pamjet filmike janë fshirë!

**“Dua drejtësi për djalin tim” — Nëna nga Fieri akuzon për dhunë në kopsht: “Dyshoj se pamjet janë fshirë!”**

Një nënë nga Fieri denoncon se djali i saj, 4-vjeçar, është dhunuar nga edukatorja në kopshtin që frekuenton. Për herë të parë, ajo foli për këtë ngjarje në emisionin “Në Kohë Reale” në RTSH dhe ngriti dyshime mbi mënyrën se si është trajtuar rasti.

Sipas saj, gjithçka ka ndodhur rreth dy javë më parë, por nuk ka marrë asnjë njoftim zyrtar. Atyre ditëve djali shkonte në kopsht duke qarë. Fillimisht e kishte konsideruar këtë si reagim të zakonshëm fëmijëror.

**Si ka mësuar për ngjarjen**

Nëna thotë se ka mësuar për incidentin përmes informacioneve që lidhen me sanitaren e kopshtit. Atë që i është thënë, edukatorja dyshohet se e ka tërhequr fëmijën nga krahu, e ka çuar pranë krevateve dhe e ka goditur me pëllëmbë. Këto pretendime nuk janë konfirmuar ende zyrtarisht.

“Unë, si prind, nuk jam njoftuar. Kam dëgjuar se institucionet ishin në dijeni të asaj që kishte ndodhur, por mua ma mohuan”, rrëfen ajo.

Ajo ka kërkuar sqarime nga punonjëset e kopshtit dhe më pas e ka pyetur edhe të birin. Sipas saj, fëmija i ka pohuar pretendimet, ndërsa edhe disa fëmijë të tjerë kanë reaguar njësoj.

**Rrëfimi i plotë i nënës**

“Ngjarja ka ndodhur dy javë më parë dhe unë, si prind, nuk jam njoftuar. Kam dëgjuar se institucionet ishin në dijeni të asaj që kishte ndodhur, por mua ma mohuan. Shenja fizike nuk ka, sepse tashmë ka kaluar java e dytë nga ngjarja. Djali atë periudhë shkonte në kopsht duke qarë, por unë mendoja se ishin teka fëmijësh. Edukatorja më kishte treguar se sanitarja kishte shkuar në drejtori dhe kishte thënë se e kishte tërhequr djalin tim te krevati dhe e kishte goditur. Sipas edukatores, sanitarja kishte thënë se do ta hiqte nga puna. Edukatorja i ishte përgjigjur se e kishte çuar fëmijën për të fjetur. Unë i thashë edukatores: ‘Rri e qetë, sepse, nëse nuk ke bërë asgjë, nuk ke pse shqetësohesh.’

Megjithatë, mua nuk më zinte vendi prej dy javësh. Nuk mund ta pranoja që unë, si prind, të mos isha njoftuar për një ngjarje të tillë. Prandaj, të hënën shkova në kopsht dhe e pyeta sanitaren përpara kamerave. Sanitarja e pranon, me zë dhe figurë, se kishte shkuar në drejtori. Ajo (edukatorja) e kishte tërhequr djalin tim nga grupi i fëmijëve, për krahu, e kishte çuar te këndi i krevateve dhe e kishte goditur me pëllëmbë. Sipas asaj që kam mësuar, kjo nuk kishte ndodhur në ambientin ku e kishin parë të gjithë, por në dhomën e gjumit, në një hapësirë ku kamerat nuk e kapnin.

Pyeta edhe edukatoren tjetër. Ajo më tha: ‘Ti pyete mirë djalin tënd’, duke lënë të kuptohej se unë nuk e kisha pyetur siç duhej dhe se nuk isha bindur për atë që kishte ndodhur. Kur u ktheva në drekë, u kërkova edukatoreve dhe sanitares të dilnin nga dhoma, që të mund ta pyesja djalin. Edukatorja në fjalë nuk pranonte të dilte dhe nuk më linte ta pyesja fëmijën. Në fund, e nxora djalin nga dhoma, pa përdorur dhunë, dhe e pyeta. Ai më tha se po, kishte ndodhur. Edhe fëmijët e tjerë pohuan me kokë njëkohësisht, ashtu si edhe djali i avokatit”, rrëfen nëna.

**Përplasje me drejtoreshën dhe policia**

Situata u përshkallëzua kur nëna u kthye në kopsht për të kërkuar sqarime. Ajo thotë se ka kërkuar ndërhyrjen e policisë, pasi nuk mori përgjigjet që priste nga drejtuesit e institucionit.

Gjatë rrëfimit, gruaja pranon se e ka goditur edukatoren. Reagimi ka qenë instinktiv, sipas saj, sepse dyshonte se ngjarja po mbahej e fshehtë dhe se pamjet filmike mund të ishin fshirë.

“Më pas e çova djalin në makinën që kisha parkuar jashtë kopshtit dhe u ktheva te drejtoresha. Këmbëngulja e edukatores që unë të mos shkoja te kamerat ishte e tmerrshme. Kur më thanë në drejtori se duhej të ndiqja rrugën ligjore, thirra policinë. Aty mbërritën patrulla e policisë. Unë nuk arrita as të flisja për arsyen pse ndodhesha aty. U thoja: ‘Ju lutem, nxirreni jashtë, sepse dua drejtësi për fëmijën tim.’

Në momentin që pashë se zonjat, të cilat ishin në dijeni të ngjarjes, po e mohonin atë, dyshova se pamjet filmike ishin fshirë. Reagova instinktivisht, e godita dhe i thashë se ishte bërë e qartë që drejtësia aty kishte marrë fund. Më pas u shoqëruam në komisariat. Unë nuk kam marrë as avokat dhe as dëshmitarë. Mendoj se avokati ka dështuar, si prind dhe si avokat. Realisht, zonja nuk pëlqehet shumë, por kjo nuk e ndryshon faktin se unë kërkoj drejtësi për fëmijën tim.

Sipas meje, e vetmja që mund të dëshmonte për ngjarjen ishte sanitarja, por dyshoj se ajo e ndryshoi dëshminë përpara. Kamerat nuk e kishin kapur momentin kur djali ishte goditur, sepse nuk kemi një datë të saktë se kur kishte ndodhur ngjarja. Nga njëra anë është sanitarja, e cila thotë se nuk e mban mend saktësisht datën, nga ana tjetër është edukatorja, e cila jep një datë kur, sipas saj, nuk ka ndodhur asgjë.

Pyetja ime është: Kush është sanitarja që të japë llogari për fëmijën tim, madje edhe përpara drejtorisë, pa më njoftuar mua si prind? Unë nuk mund ta pranoja që për një ngjarje të tillë ta mësoja në mënyrë të tërthortë, ndërkohë që fëmija im kishte ditë që shkonte në kopsht duke qarë. Unë kërkoj vetëm drejtësi për fëmijën tim!”, thotë ajo.

Pas përplasjes, të dyja gratë janë nën procedim nga prokuroria. Ndërkohë, dhuna e pretenduar ndaj fëmijës nuk është konfirmuar ende.