Drejtori i Përgjithshëm i KE: Ndryshimet në Kodin e Procedurës Penale përafrojnë Shqipërinë me standardet evropiane

Projekt-ndryshimet në Kodin e Procedurës Penale u prezantuan në kuadër të reformës në drejtësi. Nisma ka në fokus përafrimin e legjislacionit me standardet evropiane. Synohet gjithashtu forcimi i garancive për personat e dyshuar dhe të akuzuar.

Vlerësimi erdhi nga Drejtori i Përgjithshëm i Këshillit të Evropës, Gianluca Esposito. Ai e cilësoi hartimin e Kodit si një ndër ndërmarrjet më me peshë për çdo shtet. Sipas tij, rëndësia shkon përtej anës teknike.

“Jemi sot këtu për këtë rast kaq të rëndësishëm. Përgatitja e Kodit Penal është një ndër sipërmarrjet më të rëndësishme në çdo vend. Kodi bën më tepër se përcakton rregullat teknike, por përcakton se si shteti i bën kërkimet, mbledhjen e provave, marrjen në pyetje, kufizimet e lirisë”, u shpreh Esposito. Ai shtoi se Kodi ndihmon në përcaktimin e së drejtës dhe në mbrojtjen e viktimave. Po ashtu, forcon besimin e publikut te drejtësia.

Esposito theksoi se suksesi në luftën kundër krimit nuk matet me numrin e personave të përfshirë. Matet me masat konkrete që merren. Kuadri ligjor për këtë mbështetet te Konventa Evropiane. Këto nuk janë parime abstrakte, nënvizoi ai. Prandaj duhen afate të qarta, përgjegjësi dhe standarde në Kodin e Procedurës Penale.

Gjatë muajve të fundit, me kërkesë të kryeministrit, Këshilli i Evropës ka dhënë mbështetje për procesin. Kontributi ka synuar përafrimin e draftit me standardet evropiane të mbrojtjes.

Në këndvështrimin e tij, ndryshimet e propozuara ruajnë ekuilibrin e paketës së reformave. Ato janë në linjë me standardet evropiane.

“Kodi penal që po prezantojmë sot vendos në balancë edhe paketën e reformave dhe është në përputhje me standardet evropiane dhe forcon të drejtat e të akuzuarve, të dyshuarve dhe të mbrojtjes. Ky përmirësim tregon angazhimin e autoriteteve shqiptare për të vazhduar me reforma kuptimplota dhe për ta përafruar sistemin me direktivën e BE-së dhe me standardet evropiane”, tha ai.