“Drejtësia po godet rendin kushtetues”- Çupi: Gjyqësori në Shqipëri është mësuar me para në xhep, nuk po i shërben qytetarëve!

**“Drejtësia po godet rendin kushtetues” – Çupi: Gjyqësori në Shqipëri është mësuar me para në xhep, nuk u shërben qytetarëve!**

Ngërçi mes gjykatës dhe qeverisë lidhur me pagat e magjistratëve vijon të thellohet. Afati i 17 shtatorit, kur pritet të miratohet ligji përkatës, nuk është më larg.

Përplasjen e fundit e ka komentuar analisti Frrok Çupi në emisionin ‘Ora e Fundit’ në ABC News. Ai vë në dukje një qëndrim të kundërt mes qeverisë dhe pushtetit gjyqësor. Sipas Çupit, kryeministri Edi Rama theksoi nevojën për pavarësinë e pushteteve, ndërsa gjyqësori po kërkon që gjithçka të varet prej tij.

Çupi e cilësoi këtë situatë si “goditjen e tretë brenda një stine”. Ai e lidhi këtë me një seri problematikash që, sipas tij, kanë tronditur vendin. Analisti akuzoi gjyqësorin se ka lënë pas dore detyrën fundamentale.

“Rama po thotë se pushtetet duhet të jenë të pavarura, ndërsa gjyqësori thotë që të gjitha të varen dhe gjyqësori të jetë i pavarur. Nëse do të ishte kështu, do të ishte si këmbanat e paakorduara dhe shteti bie. Themelorja është se kjo është goditja e tretë brenda një stine, drejtësia po godet rendin kushtetues. Jemi pas sulmeve kibernetike, luftës hibride, zjarreve dhe tani kemi sulmet e drejtësisë. Gjykatat kanë harruar që t’u shërbejnë qytetarëve, gjyqësori në Shqipëri është mësuar me para në xhep. Ligji për pagat, sipas ekspertëve, ka lënë për të dëshiruar, por ata nuk e falin sepse duan të marrin sa më shumë pagë”, tha Çupi.

Nga ana tjetër, Kryeministri Rama reagoi pas vendimit të Gjykatës Administrative për zhbllokimin e pagave për GJKKO-në dhe Gjykatën e Durrësit. Ai u kujtoi se me të njëjtin vendim duhet të veprohet edhe për çështjet që qëndrojnë prej kohës në sirtarët e saj.