“Dorëheqja? Mbase vjen momenti ta shpjegoj”/ Rama flet për protestat: Një “ushtri” profilesh false nxit narrativa

Gjatë një interviste të gjatë me gazetaren Rudina Xhunga në podcastin e tij, kryeministri Edi Rama ka rifakturizuar reagimet e qytetarëve dhe rolin e teknologjisë moderne në formësimin e opinionit publik. Ai u ndal te momente të vështira, përfshirë edhe reflektimet personale pas protestave të fundit.

Rama u shpreh se pakënaqësitë dhe debatet publike e kanë shtyrë të studiojë ndryshimet e thella në shoqëri dhe rritjen e pritshmërive ndaj institucioneve. "Kjo pasqyrë m'u bë gjithnjë e më interesante për të kuptuar shenjat. Besoj se aty fillojnë provat reale për një udhëheqës: të ketë krenari dhe kurajë të pranojë se edhe kritiku mund të ketë të drejtë," tha ai.

Kryeministri iu kthye edhe një herë deklaratës së tij të mëparshme pas nisjes së protestave në Tiranë, kur kishte përmendur mundësinë e dorëheqjes. "Dorëheqja? Mbase vjen momenti ta shpjegoj më mirë," u shpreh Rama. Si shembull, ai solli rastin e një kryebashkiaku që, pavarësisht investimeve konkrete për komunitetin, u përball me pakënaqësi.

Kjo, sipas tij, nuk është domosdoshmërisht mosmirënjohje. Është pasojë e ndryshimit të pritshmërive. "Sa më shumë ecën vendi, aq më shumë qytetari të thotë 'e po kjo tjetra?'. E kam përjetuar kur një rrugë e ndërtuar shoqërohej me duartrokitje. Sot, s'është më ashtu," kujtoi ai.

Rama pranoi se fillimisht nuk e kishte kapur këtë ndryshim ritmi. "Jo, nuk e prisja. Më deshi kohë të ndiqja shenjat dhe të analizoja. Ka pasur momente që më kanë ndihmuar shumë për të kuptuar," shtoi ai. Këtë fazë e cilësoi si "revolucioni i pritshmërive të larta".

Në këtë revolucion, përmirësimi i një shërbimi sjell automatikisht kërkesa të reja. "Është ndryshimi i stinës së Shqipërisë. Një qytet që kaloi nga dy orë ujë në 14 orë tashmë do 24," sqaroi kryeministri.

Pjesë tjetër e intervistës iu kushtua ndikimit të teknologjisë. Rama foli për profile të krijuara artificialisht në rrjetet sociale, të cilat u dhanë zë narrativeve të caktuara, sidomos lidhur me projektin në Sazan. "Ata nuk ishin realë, nuk ekzistonin. Janë të krijuar në laborator dhe i japin zë narrativave të ndryshme," deklaroi ai.

Këto profile formuan një "ushtri" llogarish të rreme. Kryeministri vuri në dukje se kjo është një sfidë e re. "Ata marrin pamje, jetë, formë dhe nuk i dallon më lehtësisht. Edhe platformat e mëdha i kanë të vështira për t'i identifikuar," theksoi Rama.

Lidhur me sulmet kibernetike nga Irani, ai u ndal te përvoja e Shqipërisë. "Ne kemi krijuar mbrojtjen kibernetike nga halli, pasi u ndodhëm përballë një sulmi. Nuk ja dolëm në fillim, por mësimi na bëri të forcohemi. Sot kemi teknologji mbrojtjeje të nivelit më të lartë, si dhe kapacitete identifikuese për ndërhyrjet e huaja," përfundoi Rama. Ai shtoi se tashmë mësojnë që para se të atribuojnë një sulm, duhet të sigurohen për të vërtetën.