“Doja të ndikoja te të tjerët”- Doli së bashku me vajzën 1-vjeçare në protestë te Kryeministria dhe u bë viral, flet i riu: Kanë baltosur emrin tim si patronazhist

Eris Xhaja foli pas videos virale me vajzën në krahë: Doja të ndikoja, më baltosën si patronazhist

Eris Xhaja u shndërrua në emrin më të përfolur në rrjet gjatë ditës së djeshme. Shkak u bë dalja e tij në protestën para Kryeministrisë me vajzën një vjeçe në krahë. Pamjet u shpërndanë me shpejtësi dhe ndezën debat të madh online.

I ftuar në emisionin “Shqipëria Live”, i riu shpjegoi motivet e veprimit. Ai iu përgjigj edhe komenteve në rrjete sociale që e akuzonin se synonte të shuante tubimin. Sipas tij, akuzat shkuan deri aty sa iu njollos emri si patronazhist.

“E ndjeva detyrim si prind të dilja në atë protestë”, tha ai. “Doja që kjo gjëja të mos vazhdonte më. Protesta të vazhdojë, por jo dhuna”.

Ai theksoi se ndjeu nevojën për të ndryshuar mënyrën e protestimit. “E ndjeva si detyrim që të ndryshojmë strategjinë e protestës, në mënyrë që ky sistem të bjerë”, u shpreh Xhaja. “Ky sistem i kalbur bie kollaj, mjafton të bojkotosh çdo gjë. Lini punët, bllokoni rrugët”.

Sipas tij, gjesti kishte edhe një mesazh për pjesëmarrësit e tjerë. “Duke bërë këtë lloj gjesti, do të ndikoja te protestuesit që të merrnin dhe ata fëmijët dhe policët nuk i prekin dot fëmijët”, shtoi ai. Ai tregoi se momenti kur iu bashkua turmës ishte i qetë. “Kur dola unë, nuk po ndodhte asgjë. Protestuesit kishin rënë në paqe dhe kur vajta unë, doja t’i jepja një zë ndryshe protestës”.

Xhaja vlerësoi se zemërimi qytetar ka arritur në ekstrem. “Unë mendoj që mllefi i qytetarëve ka tejkaluar çdo gjë, saqë arriti të më baltosnin mua, në vend që të merreshin me kauzën”, deklaroi ai. Ai foli edhe për arsyen personale që e lidh me praninë e vajzës. “Tek fëmija kam ndikuar në nënvetëdijën e saj, që kur të rritet, të përgjigjet për të ardhmen e atdheut të saj”.

I riu tregoi më tej se ka punuar gjithmonë si kamarier. “Unë gjithmonë kam punuar kamarier”, tha ai. “Për momentin jam pa punë”.

Në fund ai u ndal te dhuna ndaj të rinjve gjatë tubimeve. “Po ndodh gjakderdhje, po dhunohen dhe masakrohen adoleshentë”, u shpreh Xhaja. “Nuk duhet që ata të dhunohen”, përfundoi ai.