Dita e pestë, protestuesit pretendojnë për goditje me plumba gome, Policia: Janë shpërqendrues!

Protesta para Ministrisë së Arsimit në Tiranë ka hyrë në ditën e pestë. Gjatë tubimit ka pasur sërish tensione mes efektivëve dhe demonstruesve.

Disa prej protestuesve janë paraqitur para kamerave me disa objekte në duar. Sipas tyre, bëhet fjalë për plumba gome të hedhur nga policia në momentet e përplasjes.

Pretendimet u artikuluan gjatë transmetimit direkt. Protestuesit thanë se mjetet e shfaqura janë përdorur nga forcat e rendit kur ndërhynë për të shpërndarë turmën.

Nga ana tjetër, Policia ka dhënë një version ndryshe. Burime nga uniformat blu, në një komunikim për gazetaren Dorjana Bezat, sqaruan se nuk janë përdorur plumba gome, por mjete shpërqendruese.