“Dikur shkonin për ndonjë dasmë ose vaki”- Rama bën krahasimin në dy kohë për Malësinë e Madhe dhe Përmetin: Dukeshin si vende pa shpresë, sot destinacione

Episodi i sotëm i podcast-it "Flasim" u hap me një reflektim të kryeministrit Edi Rama për dy zona të vendit. Në fokus ishin Malësia e Madhe dhe Përmeti.

Kreu i qeverisë foli për ndryshimin rrënjësor që kanë njohur këto dy pika të hartës gjatë dhjetë viteve të fundit. Sipas tij, nëse dikur nuk përbënin asnjë interes dhe dukeshin të humbura, sot ato përfaqësojnë fytyrën e Shqipërisë së re. Kjo Shqipëri, theksoi ai, është ndërtuar me shumë mund. Kjo pavarësisht zërave që dëgjohen në protestat përballë kryeministrisë, të cilët pretendojnë të kundërtën.

Duke kujtuar të shkuarën, Rama solli një krahasim mes dy kohëve. Episodi në fjalë është i pesti i sezonit të shtatë të "Flasim". Ai kujtoi edhe periudhën kur mbante një detyrë tjetër dhe i duhej të lëvizte në gjithë territorin.

"Duke përgatitur pak minuta më parë këtë episod që është i pesti i sezonit të shtatë të podcastit ‘Flasim’, po mendoja që njëherë e një kohë, por jo 100 vjet përpara, 10 vjet përpara, qoftë Malësia e Madhe, qoftë Përmeti ishin ndër ato pika në hartën e Shqipërisë që dukeshin shumë larg dhe nga ana tjetër, ku dukej për së largu, pa shkuar, që s’kishte asnjë arsye për të shkuar. Kujtova po ashtu që në kohën kur unë nuk isha ende në këtë detyrë dhe për shkak të detyrës që kisha më parë, duhet të bridhja Shqipërinë. Qoftë Malësia, qoftë Përmeti ngjanin si vende pa shpresë, ky kush ishte aty ishte thjesht ende aty, por të nesërmen s’do të ishte më aty. Kush vinte, vinte ose se kishte familjen aty për t’i parë ose se në rastin më të zakonshëm një dasmë ose larg qoftë, një vaki. Sot janë dy destinacione të Shqipërisë së re, Shqipërisë tjetër që kemi ndërtuar me shumë mund ndërkohë që nga bulevardi i Tiranës shumëçka mbulohet me retë artificiale të kanaleve sociale dhe të ekraneve”, tha Rama.

Sipas kryeministrit, dy zonat që dikur vizitoheshin vetëm për arsye familjare janë sot destinacione të mirëfillta. Mesazhi ishte i qartë.