Dhuna në protestë, Policia arreston 11 persona, mes tyre dy të mitur! Pranga edhe 33-vjeçarit që dogji Komisariatin nr. 3, ku u plagosën 10 efektivë

Drejtoria Vendore e Policisë Tiranë ka mbyllur një fazë të re të hetimeve për aktet e dhunës gjatë tubimit të zhvilluar dje në kryeqytet. Bilanci: 11 të arrestuar dhe 7 persona të proceduar penalisht në gjendje të lirë. Mes të ndaluarve ka edhe dy të mitur.

Në pranga kanë rënë në flagrancë nëntë persona: E. P., 29 vjeç, G. K., 24 vjeç, F. B., 19 vjeç, E. B., 23 vjeç, S. D., 52 vjeç, E. B., 27 vjeç, A. D., 23 vjeç, L. Z., 18 vjeç dhe E. B., 20 vjeç. Po ashtu, u ndaluan edhe dy shtetas të mitur. Sipas njoftimit zyrtar, veprimet erdhën “në vijim të veprimeve hetimore dhe procedurale” të shërbimeve të Drejtorisë Vendore të Policisë Tiranë.

Një hetim i veçantë u përqendrua te sulmi ndaj Komisariatit të Policisë Nr. 3. Specialistët e Hetimit të Krimeve arritën të identifikojnë dhe të ndalojnë shtetasin E. K., 33 vjeç. Ai dyshohet se gjatë tubimit, tri ditë më parë, ka dëmtuar me sende të forta ambientet e këtij komisariati.

Godina u sulmua me lëndë piroteknike, gurë dhe bomba molotov. Zjarri dhe dëmtimet që pasuan lanë të plagosur 10 punonjës policie.

Materialet procedurale iu referuan Prokurorisë për veprime të mëtejshme. Në dosje janë të përfshira veprat penale “Shkatërrimi i pronës”, “Shkatërrimi i pronës me zjarr”, “Goditjet për shkak të detyrës”, “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të Policisë të rendit publik”, “Prishja e qetësisë publike”, “Mosbindja ndaj urdhrit të punonjësit të policisë së rendit publik”, “Shkelja e rregullave mbi lëndët plasëse, djegëse dhe radioaktive”, “Pengimi i qarkullimit të mjeteve”, “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi, mbajtja, blerja apo shitja pa leje e armëve të ftohta”.