Dhuna në kopsht, dy persona nën hetim! Nëna goditi edukatoren në Fier, Policia heton edhe dyshimet për dhunë ndaj fëmijës

**Hetim në Fier për dhunën e pretenduar në kopshtin nr. 10, nën lupën e drejtësisë nëna dhe edukatorja**

Policia e Fierit ka nisur hetim për një rast dhune të pretenduar brenda kopshtit me numër 10 të qytetit. Ngjarja ka ndodhur pak ditë më parë dhe përfshin një edukatore 44-vjeçare e një nënë të një fëmije katër vjeç.

Sipas të dhënave, nëna e ka sulmuar fizikisht edukatoren, pasi e akuzonte se i kishte ushtruar dhunë të miturit. Hetimet, andaj, janë shtrirë mbi të dyja gratë.

Edukatorja e kopshtit publik hetohet në gjendje të lirë, me dyshimet për keqtrajtim të fëmijës. Ndaj nënës, nga ana tjetër, rëndon akuza për dhunën e ushtruar ndaj punonjëses së kopshtit.

Prej Policisë së Fierit bëhet me dije se ekzaminimi i të miturit nuk ka nxjerë në pah shenja dhune. Theksohet, mirëpo, se dosja nuk është mbyllur dhe hetimi vijon.

Evis Hadermataj, avokati që mbron edukatoren, thotë se nëna është vënë në dijeni nga sanitarja e kopshtit. Kjo e fundit, sipas raportimit të TCH, është pezulluar nga puna pas incidentit.

“Pranë punonjësve të policisë, sanitarja ka deklaruar se nuk e ka parë edukatoren duke ushtruar dhunë ndaj fëmijës. Nga veprimet e kryera deri më tani, përfshirë pamjet e kamerave, sipas informacionit që kemi, nuk ka rezultuar ushtrim dhune”, u shpreh avokati.

Burimet bëjnë me dije se fëmija katër vjeç vijon të shkojë në kopshtin numër 10 në qytetin e Fierit. Hetimet për të vërtetuar nëse ka pasur dhunë ndaj të miturit, si dhe për të dokumentuar përgjegjësitë në konfliktin mes nënës e edukatores, vazhdojnë.