Dhjetëra të lënduar – zbulohen detaje dhe pamje të aksidentit kur një tren pasagjerësh doli nga shinat në Francë -

Të premten në mbrëmje, rreth orës 19:45, një tren pasagjerësh doli nga shinat në rajonin normand të Francës. Ngjarja ndodhi afër Cléon, gjatë udhëtimit midis qyteteve Rouen dhe Caen.

Zyrtarët konfirmuan se në bordin e trenit ndodheshin 186 udhëtarë. Për pasojë, 44 prej tyre u lënduan. Mes të plagosurve, një grua 18 vjeçe u evakuua në gjendje kritike.

“Papritur pati disa tronditje”, rrëfeu për mediat vendore pasagjeri Louis, 24 vjeç. “Më pas, pas rreth tre sekondash, ato u bënë gjithnjë e më të fuqishme. Dritaret u thyen pjesërisht dhe gurët nga shinat hynë brenda vagonit. Ishte vërtet tronditëse. Ende po dridhem”, shtoi ai.

Ministri i Transportit, Philippe Tabarot, e bëri të ditur ngjarjen në rrjetin social X. Sipas tregimeve të dëshmitarëve, tymi dhe pluhuri mbushën ambientet e trenit pak çaste pas daljes nga binarët.

Në ndihmë të të lënduarve u mobilizua një plan reagimi për incidente me shumë të plagosur. Mbi 130 zjarrfikës, pesë ekipe mjekësore dhe 80 automjete u vu në dispozicion të operacionit.

Prokurori i Rouen-it, Sebastien Gallois, bëri të ditur se gjendja e gruas së re, e cila ishte në urgjencë absolute, është stabilizuar dhe jeta e saj nuk është më në rrezik. Ndërkohë, testet për drogë dhe alkool kryer ndaj drejtuesit të trenit rezultuan negative.

Kompania hekurudhore SNCF Reseau, që menaxhon rrjetin hekurudhor francez, njoftoi pezullimin e qarkullimit në këtë linjë. Furnizimi me energji elektrike në shina u ndërprerë për t'i hapur rrugën ndërhyrjes së shërbimeve të urgjencës.

Aksidenti po hetohet nga policia dhe autoritetet hekurudhore. Autoritetet vendore dyshojnë se mund të ketë qenë një akt i qëllimshëm shkaktar i daljes së trenit nga shinat. Hetimet po vazhdojnë për të përcaktuar shkaqet e sakta të ngjarjes.