“Dhjetë mijë euro gjobë për dhunuesit”- Senati francez miraton paketën ligjore kundër dhunës në protesta

Titulli: “Dhjetë mijë euro gjobë për dhunuesit”- Senati francez miraton paketën ligjore kundër dhunës në protesta

Senati francez dha miratimin për një projektligj që e bën protestuesin përgjegjës me xhepin e vet për dëmet e shkaktuara gjatë demonstratave të dhunshme.

Me 229 vota pro dhe 105 kundër u miratua nisma, e cila po ngre shqetësime për mundësinë e kufizimit të të drejtës së protestës.

Sipas tekstit, personat e gjendur përgjegjës do të thyejnë xhepin për të paguar një shumë deri në 10 mijë euro si çmim për dëmet.

Projektligji parashikon edhe masa shtesë. Bëhet fjalë për mundësinë që personave të lidhur me grupet e dhunës t'u pritet ndihma ekonomike ose përfitimet sociale.

Ministri i Brendshëm, Laurent Nuñez, theksoi se nuk është e drejtë që të gjithë qytetarët të mbulojnë veprat e një pakice që merret me vandalizëm.

Por kundërshtimi vjen nga partitë e majta dhe organizatat e të drejtave të njeriut. Ato paralajmërojnë se masa të tilla hapin rrugë për veprime arbitrare të policisë, të cilat mund të merren pa prova të mjaftueshme ose pa respektuar të drejtat e njerëzve.

Edhe Amnesty International i ka bërë thirrje qeverisë të braktisë këtë nismë, duke aluduar për pasoja të rënda në planin social.

Tani projektligji udhëton drejt Asamblesë Kombëtare, ku do të diskutohet dhe votohet për hapat që mbeten.