DETAJET/ SPAK operacion në Shkodër, “Muri i lartë” prangos Bledar Cafin, arrin të shpëtojë Indrit Dokle! Të dy akuzohen për trafik droge dhe grup të strukturuar (FOTO)

Operacioni i koduar “Muri i Lartë” u finalizua mëngjesin e 26 shtatorit në Shkodër nga Policia e Shtetit në bashkëpunim me SPAK-un dhe Byronë Kombëtare të Hetimit.

Lajmi u bë publik nga vetë uniformat blu.

Në pranga ra 50-vjeçari Bledar Cafi, i konsideruar me rrezikshmëri të lartë shoqërore. Ndërsa objektivi i dytë, 43-vjeçari Indrit Dokle i njohur edhe si Endrit Dokle, nuk u gjet në banesë gjatë ndërhyrjes. Ai përshkruhet si ish-drejtues i një grupi kriminal në Durrës, me origjinë nga Kukësi dhe banim në Tiranë.

Të dy ndajnë të njëjtat akuza. Gjykata e Posaçme për Korrupsionin dhe Krimin e Organizuar caktoi ndaj tyre masën “arrest me burg” një ditë më parë, më 25 shtator 2026. Akuzat lidhen me trafikim të lëndëve narkotike në bashkëpunim, në formën e grupit të strukturuar kriminal, si dhe me krijimin e grupit të strukturuar kriminal. Në dosje përfshihet edhe vepra “Kryerja e veprave penale nga organizata kriminale dhe grupi i strukturuar kriminal”.

Emri i operacionit lidhet me një detaj nga terreni. Për të hyrë në banesën e shënjestruar, efektivët e RENEA-s u detyruan të kapërcenin një mur të lartë. Pamjet e këtij momenti u shpërndanë nga Policia bashkë me njoftimin zyrtar.

Aksioni u zhvillua nën drejtimin e Prokurorisë së Posaçme dhe në zbatim të vendimit të GJKKO-së. Në terren u angazhuan Forcat Speciale Renea, Drejtoria e Forcës së Posaçme Operacionale, Drejtoria për Hetimin e Narkotikëve, Drejtoria Vendore e Policisë Shkodër dhe agjentë të BKH-së. Qëllimi ishte ekzekutimi i masave të sigurisë personale dhe kontrollet për lokalizimin e personave të shpallur në kërkim.

Arrestimi i Cafit u krye në orët e para të mëngjesit të sotëm, brenda banesës së tij në Shkodër. Ai kishte lindur dhe banonte në të njëjtin qytet.

Në zbatim të të njëjtit vendim u kontrolluan edhe ambientet që i përkasin shtetasit E. D., alias I. D. Bëhet fjalë për 43-vjeçarin e lindur në Kukës dhe me banim në Tiranë, i shpallur në kërkim që prej vitit 2024. Efektivët nuk e gjetën në adresat e verifikuara. Policia njoftoi se kërkimet për kapjen e tij vijojnë ende.