Detaje të reja rreth ish-shefit të inteligjencës gjermane, i arrestuar nën dyshimet për spiunazh

Arrestimi i ish-drejtorit të inteligjencës gjermane trondit Berlinin në kohën e reformave për shërbimet sekrete

Një ish-drejtues i shërbimit sekret të Gjermanisë është vënë në pranga të martën. Akuzat ndaj tij janë spiunazh dhe tradhti. Rasti konsiderohet skandaloz për vendin. Ndodh pikërisht kur Berlini po përpiqet të zgjerojë kompetencat e agjencive të zbulimit.

Bëhet fjalë për August Hanningun. Ai drejtoi Shërbimin Federal të Inteligjencës, BND, në periudhën 1998-2005. Prokuroria federale bëri të ditur se ndaj tij rëndojnë akuza për spiunazh, tradhti dhe bashkëpunim me inteligjenca të huaja. Emrat e shteteve përfituese nuk u bënë publikë.

Revista “Spiegel” raportoi detaje të tjera. Sipas burimeve të paidentifikuara të cituara prej saj, Hanningu kishte pasur kontakte me një operativ të shërbimit sekret të Azerbajxhanit.

Në pranga ra edhe ish-shefi i kabinetit të tij. Ai identifikohet vetëm si Manfred D. Edhe ai ka vijuar punën në shërbimin sekret deri në mars të vitit 2026.

Sipas akuzës, Manfred D. ka vepruar gjatë kohës që punonte për pasuesit e Hanningut. Ai siguronte informacione të klasifikuara dhe më pas ia shiste ish-eprorit. Ky i fundit ushtronte ndërkohë aktivitetin si konsulent privat.

Më pas Hanningu dyshohet se i ka shfrytëzuar këto të dhëna për punën e tij private. Prokurorët thonë se ai ka përgatitur një material informues për një spiun të huaj. Gjithashtu dyshohet se i ka përcjellë informacione një agjenti të një tjetër shërbimi të huaj.

“Spiegel” shkruan se informimi ishte destinuar konkretisht për spiunin azerbajxhanas.

Hanningu akuzohet edhe për një tjetër linjë kontaktesh. Ai ka qenë “në kontakt të ngushtë me një përfaqësues të një shërbimi tjetër të huaj të inteligjencës”. Për disa vite me radhë i ka kaluar atij të dhëna me karakter politik. Një pjesë e tyre ishte hartuar mbi bazën e materialeve të siguruara nga Manfred D.

Transmetuesi publik ARD dha më shumë hollësi. Sipas tij, dosjet e përcjella nga Manfred D. përfshinin materiale mbi programin bërthamor të Iranit dhe mbi ushtrinë ruse. ARD citoi burime sigurie. Sipas tyre, një pjesë e këtyre informacioneve vinte nga agjenci partnere jashtë Gjermanisë.

Reagimi politik ishte i menjëhershëm. Deputeti i opozitës Konstantin von Notz, nga Partia e të Gjelbërve, i tha agjencisë AFP se akuzat janë “të rënda dhe thellësisht shqetësuese”. Ai kërkoi hetim për “dëmin e mundshëm” të shkaktuar.

Von Notz është anëtar i komisionit parlamentar që mbikëqyr shërbimet sekrete. Ai tha se ka kritikuar shpesh “aktivitetet e dyshimta dhe të gjera lobuese të ish-zyrtarëve të lartë”.

“Ato janë padyshim edhe një pikë hyrëse për shërbimet armiqësore të inteligjencës”, u shpreh ai.

Akuzat dolën në pah gjatë një tjetër dosjeje ku u përfshi Hanningu. Bëhet fjalë për çështjen e Christina Block. Ajo është trashëgimtare e një zinxhiri restorantesh dhe po gjykohet për urdhërimin e rrëmbimit të dy fëmijëve të saj.

Në atë dosje, Hanningu dhe një ish-polic në pension akuzohen se morën mbi 100 mijë euro nga Block. Shuma u dha në këmbim të kthimit të fëmijëve nga Danimarka. Atje ata jetonin me ish-bashkëshortin e saj.

Kontrolli në pronën e Hanningut u zhvillua në shtator të vitit 2025. Pikërisht ai çoi në hapjen e hetimit aktual.

Kryetari i komisionit parlamentar për mbikëqyrjen e inteligjencës, Marc Henrichmann, deklaroi se Gjermania “nuk do ta tolerojë tradhtinë e sekreteve”.

“Kushdo që bashkohet me armiqtë e demokracisë sonë liberale do të zbulohet”, tha ai. Sipas tij, sjellja e pretenduar e Hanningut do të përbënte “shkelje të rëndë të detyrave të tij zyrtare”.

Në Gjermani tradhtia dënohet deri me burgim të përjetshëm.

Skandali shpërtheu pak javë pasi qeveria miratoi një reformë të gjerë. Ajo u jep agjencive të inteligjencës më shumë kompetenca për operacione të fshehta. Reforma u miratua muajin e kaluar.

Deri tani BND-ja dhe Shërbimi Federal për Mbrojtjen e Kushtetutës, BfV, që mbulon zbulimin e brendshëm, kanë pasur më pak pushtet se homologet jashtë vendit. Autoritetet duan t’i forcojnë. Qëllimi është përballja me kërcënimet në rritje, sidomos nga Rusia.

Reformat pritet të kalojnë në parlament në fillim të vitit të ardhshëm.

Shefi aktual i BND-së, Martin Jaeger, tha se agjencia kreu hetime të brendshme. Ato ishin të gjera dhe u zhvilluan me shpejtësi ndaj Hanningut. Më pas dosja kaloi te prokurorët federalë.

“Për BND-në dhe për mua, nuk ka kompromis kur bëhet fjalë për sigurinë e brendshme”, i tha Jaeger gazetës “Rheinische Post”. Ai shtoi se ngjarja “nuk ka vënë në pikëpyetje asnjë nga qëllimet apo prioritetet e mia”.

Prokurorët bëjnë të ditur se Manfred D. i kishte dorëzuar Hanningut rreth 2 mijë dokumente. Shumë prej tyre përmbanin të dhëna të klasifikuara.

Hanningu, i cili nga viti 2005 deri në 2009 ishte zyrtari më i lartë civil në Ministrinë e Brendshme, i përdori këto materiale të klasifikuara “për të hartuar një analizë për një zyrtar të një shërbimi të huaj të inteligjencës”.

Megjithatë, mbetet e paqartë nëse “materiali ka arritur te marrësi i synuar”. /ABC24.AL/