Detaje të reja nga atentati në Mirditë, publikohet foto e viktimës Viktor Bardhi

**Detaje të reja nga atentati në Mirditë, publikohet foto e viktimës Viktor Bardhi**

Hetime intensive po kryhen pas ekzekutimit me armë zjarri të Viktor Bardhit në fshatin Ndërfushas të Mirditës. Lëvizjet e autorëve para dhe pas ngjarjes po rindërtohen nga hetuesit, me pistën kryesore të hetimit që mbetet ajo e gjakmarrjes.

Sipas të dhënave paraprake, autorët dyshohet se janë larguar nga vendi i krimit duke shfrytëzuar një nënkalim në “Rrugën e Kombit”. Për të humbur gjurmët, ata kanë djegur mjetin e tyre rreth 20 minuta pas ngjarjes në fshatin Monaz. Më pas, dyshohet se kanë kaluar në një automjet tjetër për t’iu shmangur kamerave të sigurisë dhe kontrolleve policore.

Hetuesit dyshojnë se autorët kanë pasur ndihmë nga persona të tjerë, të cilët i kanë pritur me mjetin e ri për të vijuar arratisjen. Verifikimet në hyrje-daljet e Rrëshenit nuk kanë zbardhur ende identitetin e mjetit të parë të përdorur. Nga analiza e kamerave të sigurisë në ato pika, nuk është evidentuar asnjë gjurmë e automjetit që u gjet i djegur në Monaz.

Kjo ngjarje tragjike është pjesë e një konflikti të përgjakshëm që ka pllakosur zonën prej vitit 2016 mes familjes Bardhi dhe një fisit tjetër. Zanafilla nis me vrasjen e Saimir Jakut në atë vit. Pas tij, janë ekzekutuar nëntë persona të tjerë nga të dy palët në vite. Për këtë sulm të fundit, dyshohet se viktima, Viktor Bardhi, është shtuar në listën e gjatë të kësaj sage hakmarrjeje.

Vetë Viktor Bardhi i bashkohet listës tragjike të familjes. Më herët janë vrarë vëllai i tij, Martin Bardhi, në vitin 2023 dhe nipi i tij, Kristian Bardhi, në janar të vitit 2025. Këto dy ngjarje ende nuk janë zbardhur plotësisht nga drejtësia.

Në kuadër të hetimeve për këtë atentatin më të fundit, Drejtoria e Policisë së Lezhës ka shoqëruar një person në komisariat. Verifikimet vijojnë për identifikimin dhe kapjen e autorëve, si dhe të bashkëpunëtorëve të mundshëm që mund t’i kenë ndihmuar në arrati.