Detaje nga atentati me tritol në Gjirokastër/ I vendosën 300 gramë eksploziv në makinë, i ati i Erigels Mela ka qenë prokuror

Detaje të reja janë zbardhur për shpërthimin me tritol në Gjirokastër. Viktimë mbeti 45-vjeçari Beqir Devolli, i njohur me nofkën "Çilo Hunderri". Në të njëjtin ngjarje u plagos 26-vjeçari Erigels Mela.

Burime pranë grupit hetimor bëjnë me dije se lënda plasëse e vendosur në automjet ishte rreth 300 gramë. Kjo është përllogaritja paraprake pas këqyrjes së makinës.

Të dhëna kanë dalë edhe për familjen e të plagosurit. I ati i Erigels Melës ka qenë prokuror në Prokurorinë e Gjirokastrës. Ndërsa e ëma, Mimoza Mela, punon aktualisht si sekretare në këtë institucion.

Devolli kishte qëndruar dy vjet në arrest shtëpie në Tiranë.

Sipas hetuesve, shpërthimi pranë policisë ishte i menduar mirë. Autorët kanë pritur momentin kur rruga të boshatisej. Hetimi nuk përjashton as pistën e hakmarrjes. Ajo lidhet me Artan Myrtajn, i cili u vra me armë zjarri në Sarandë dy javë më parë.